Qimmit “tunillatsinnissaminnut aarlerinartumiinngitsut” immikkut piumasaqaateqarani kapitissinnaalissapput

Qimmit “tunillatsinnissaminnut aarlerinartumiinngitsut” akiuussutissamik kapitinneqarnissaannut immikkut piumasaqaateqarani kapitissinnaalissapput

Qimmit qimuttut kiisalu qimmeqarneq qitsuuteqarnerlu pillugit Inatsisartut inatsisaata allanngortinneqarnera januaarip aallaqqaataanit 2017-imi atuutilerpoq.

Qimmiutillit januaarip aallaqqaataanit inatsit naapertorlugu pinngitsooratik qimmitik qimmit nappaataannut parvovirusimullu akiuussutissamik kapitittussaavaat. Tamanna pissaaq Naalakkersuisunit akiuussutissalersuinermi periusissatut aalajangersarneqarsimasoq naapertorlugu.

Inatsisip allanngortinneqarnera naapertorlugu Kalaallit Nunaanni qimmiutillit tamarmik qimmitik qimmit nappaataannut parvovirusimullu akiuussutissamik ukiumi siullermi pingasoriarlugit kapitittussaavaat, tamatuma kingorna ukiut pingasut qaangiukkaangata akiuussutissamik kapiteqqittassallutik.

Immikkut akuersissut qimminut “tunillatsinnissaminnut aarlerinartumiinngitsunut” atuuppoq. Tunillatsinnissaminnut aarlerinartumiinngitsut, tassaapput qaasuitsup kujataani illoqarfiit nunaqarfillu, Tunumi qimmeqarfiusut pinnagit.

Qimmiutillit Naalakkersuisunut uppernarsassavaat qimmiutitik inatsisip atuutilinnginnerani aalajangersimasumik qimmit nappaataannut parvovirusimullu akiuussutissamik kapitittarsimallugit.

Uppernarsaat atuuttoq tassaasinnaavoq:

  • Uumasup peqqissusianut nalunaarsuiffimmi imaluunniit EU passimi akiuussutissamik kapititsisimanermut nalunaarsuinerit
  • Uumasup nakorsaata namminersortup qimmeq pillugu nalunaarsuiffia
  • Uumasup nakorsaata imaluunniit qimminik nakkutilliisup ataasiarluni akiuussutissamik kapisisimanerata uppernarsaataa

Kalaallit Nunaanni Uumasunut Nakorsaqarfik Inuussutissalerinermullu Oqartussaaffik (UNIO) kisimi uppernarsaatinik atuuttulersitsisinnaavoq aamma piumasaqaatit pillugit nalilersuisinnaatitaalluni.

Immikkut ittumik Kalaallit Nunaanni Uumasunut Nakorsaqarfik Inuussutissalerinermullu Oqartussaaffimmit piumasaqaatit akuerineqarpata, qimmeq ukiut pingasut  aatsaat  qaangiuppata akiuussutissamik kapitinneqassaaq, kingullermik kapitinneqarata ullua naapertorlugu.

Immikkut akuersissut taamaallaat 2017-imut atuuppoq.

UNIO-p erseqqissaassutigissavaa suli inatsisit malillugit qimmit aamma qitsuit perlerornermut akiuussutissamik kapitinneqartussaammata.

Uumasuutillip nammineerluni akisussaaffigivaa uppernarsassallugu uumasuutimi piumasaqaatigineqartut naapertorlugit akiuussutissamik kapitissimanera.

Kalaallit Nunaanni Uumasunut Nakorsaqarfik Inuussutissalerinermullu Oqartussaaffik attavigineqarsinnaavoq:

Uumasunut Nakorsaqarfik Inuussutissalerinermullu Oqartussaaffik

Imaneq 4

3900 Nuuk

E-mail: uumasut@nanoq.gl