APN Kalaallit Nunaanni nannut piniagaanerannut pisortaqarfittut ingerlatsisuuvoq

Matumuuna naqissusilerneqassaaq Kalaallit Nunaanni Namminersorlutik Oqartussani Aalisarnermut Piniarnermullu Naalakkersuisoqarfik Kalaallit Nunaanni nannut piniagaanerisa aqunneqarnerinut ingerlatsisuummat.

Taamaammat WWF nannunit tunisassiat nunanut allanut tunisaanerisa iluatsisimaarnissaannik piniartunut neriorsuisinnaanngilaq. Nannunit tunisassianik nunanut allanut annissuisarnermik nammineerluta unitsitsisimanitta atorunnaarsinneqarnissaata eqqarsaatersuutigilernissaa suli ungasippoq qaquguussagaluarnerpoq. Siullertut Kalaallit Nunaata Canadallu akornanniittut nannut pillugit Ataatsimoorluni Ataatsimiititaliarsuup pisassiissutinik siunnersuuteqarsimasariaqassaaq tullinnguuttullu piujuartitsinissamik tunngaveqarnermik eqquutsitsisoqarnera nalunaarutigineqarsimassaaq.

Piujuartitsinissamik tunngaveqarnermik eqquutsitsisoqarneranik nalunaaruteqarneq

Kalaallit Nunaata uumasuneersunik naasuneersunillu nunanut allanut annissuissaguni uppernarsarsinnaasariaqarpaa niuerneq uumasoqatigiinnut pineqartunut ajoqutaassanngitsoq, tamatumanilu nunat tamalaat aalajangersagaat ilannguffiginikuullugit. Taamaammat piujuartitsinissamik tunngaveqarluni piniartoqartartussaavoq. April-imi 2008-mi Kalaallit Nunaat Danmarkip /EU-p tunisassianik nannuneersunik eqqusseqqusiunnaarnerannut atatillugu nammineerluni annissueqqusiunnaarpoq. Annissueqqusiunnaartoqarpoq USA-p nannut CITES-imi allattorsimalernissaannik siunnersuuteqarneranut ilanngullugu, pissutigalugu uppernarsarneqarsinnaanngimmat piujuartitsinissamik tunngaveqarluni piniartoqartarsimanersoq.

Tunisassianik nannuneersunik nunanut allanut annissuisoqassappat piujuartitsinissamik tunngaveqarnermik eqquutsitsisoqarneranik nalunaaruteqartoqarsimassaaq. Piujuartitsi-nissamik tunngaveqarnermik eqquutsitsisoqarneranik nalunaaruteqartoqarnerata pinngortitamik illersuisussaatitaanermik pisussaaffiliivoq taamatullu uumassusillit assigiinngiiaartuunerannik ataannartitsineq piujuartitsinissamillu tunngavilimmik mianersortumik iluaquteqarneq. Uumasoqatigiit CITES-ip allattuiffiani II-mi allassimasut aatsaat tuniniarneqarsinnaapput piujuartitsinissamik tunngaveqarnermik eqquutsitsisoqarneranik nalunaaruteqartoqarsimappat.

Nannut maannakkut piujuartitsinissamik tunngaveqarnermik eqquutsitsiviunngitsutut - NDF (Non Detriment Findings) - nalunaarutigineqarsimapput pissutigalugu sumiiffiimmi ilaanni piniagaanerat uumassusilinnik misissuisunit siunnersuuteqarfigineqartanngimmat.

 

Nanoqarfiusunut tamanut uumassusilinnik misissuisut siunnersuisarnissaat

Maannakkorpiaq Kalaallit Nunaanni nanoqarfiusunut tamanut uumassusilinnik misissuisut siunnersuisalernissaat tamaviaarullugu sulissutigineqarpoq. Aasakkut 2016-imi Kalaallit Nunaat Kane Basinimi aamma Baffin Bugtenimi nannunut uumassusilinnik misissuisut siunnersuinerannik tigusaqarpoq. Siunnersuinerup tiguneqareernerani maannakkut oqartussat iluani aamma tamanut ammasumik tusarniaasaqattaartoqalerpoq, Nunavut/Canada ataatsimeeqatigineqartarlutik taamatullu Kalaallit Nunaata aamma Nunavut akornanni pisassiissutit agguaanneqarnissaat naatsorsorneqalerlutik. Sulissutigineqartut 1. januar 2018-imiit atuutilersumik naammassineqassasoq naatsorsuutigineqarpoq.

Tunumi nannunik kisitsinerit ingerlalluarput 2020-mi naammassineqassasut naatsorsuutigineqarluni. Tamatuma kingornatigut taamatuttaaq uumassusilinnik misissuisut siunnersuinerinik, oqartussat iluani tusarniaanernik pisassiissutissallu naatsorsorneqarnerinik tigooraalluni piffissaq ingerlaqqaassaaq. Ingerlaaserli Kalaallit Nunaata Kitaanisut sivisutigiunnanngilaq pissutigalugu nannut Tunumiittut nunanut sanilerisanut Svalbard/Norgemut attuumassuteqarnissaat ilimananngimmat.

Erseqqinnerusunik paasissutissarsiniartoqarsinnaavoq Immikkoortortaqarfiup pisortaa Amalie Jessen, amalie@nanoq.gl – oqarasuaat 345304/553342 Imaluunniit Naalakkersuisoqarfiup pisortaa Jørgen Isak Olsen, jio@nanoq.gl 345000 saaffigalugit