Nunatsinni oqaatsinik ilinniartitsineq immikkut ilisimasalinnit misissuivigineqassaaq

Nunatsinni atuartut kalaallit, qallunaat tuluillu oqaasiinik ilisimasaat patajaallisarneqassapput. Taamaammat Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisup Doris Jakobsenip suleqatigiissitaq immikkut ilisimasalinnik inuttaqartoq pilersippaa, oqaatsinik ilinniartitsinermik misissueqqissaartussaq, qanorlu pitsanngorsaasoqarsinnaaneranik inassuteqaatinik saqqummiussisussaq.

”Nunatsinni meeqqat atuarfiat pillugu Danmarks Evalueringsinstitutip nalunaarusiaa atuareerlugu, uannut ersarissilluinnarpoq, atuarfitsinni oqaatsinik ilinniartitsineq annertuumik pitsanngorsaavigineqartariaqartoq. Suliassaq annertuvoq, angusaqarluassaguttalu aallaqqaammut misilittakkatigut ilisimasatigullu tunngavissaqarluartariaqarpugut. Suliassaq tamanna immikkut ilisimasalittut suleqatigiissitat aallartilerpaat, inerniliiumaarnerallu assut pissangagivara,” Doris Jakobsen oqarpoq.

Immikkut ilisimasalittut suleqatigiissitani inuttaapput Kalaallit Nunaannit, Islandimit, Danmarkimit Canadamillu pineqartup iluani immikkut ilisimasallit sisamat. Suleqatigiissitani siulittaasoq, Anne Holmen Københavnip Universitetiani arlariinnik oqaaseqarnermik professoriusoq, oqarpoq:

”Nuannaarutigaara atuartut oqaatsinik ilikkagaqartarnerisa patajaallisarnissaannut atatillugu unamminartut maanna Kalaallit Nunaanni misissorneqarnialermata. Suliassaq pingaaruteqarlunilu pissanganartuuvoq, aallartinnissaalu suleqatigiissitani ilaasortat tamarmik qilanaarivaat.”

Immikkut ilisimasalittut suleqatigiissitaat suliaat nalunaarusiornermik inaarsarneqassaaq, taannalu ilimagineqarpoq 2018-ip aallartinnerani tamanut saqqummiunneqassasoq.

Suliakkiissut uani atuaruk

Annertunerusumik paasisassarsiorfiusinnaasoq tassaavoq Naalakkersuisup allattaa Rosa Thorsen. E-mailikkut: rosat@nanoq.gl, oqarasuaat: +299 34 57 02