Sisimiuni innuttaasunik ataatsimiititsineq ingerlalluartoq

Naalakkersuisut Siulittaasuata Kim Kielsenip Sisimiuni innuttaasunik marlunngorermi unnukkut ataatsimiititsinera soqutigineqarluarpoq, apersuerusussuseqartoqarluni ataatsimiititsisoqarneranillu nuannaarutiginnittoqarluni. Sisimiuni innttaasunik ataatsimiititsineq tulleriinnut arlalinnut aallarniutaavoq, ulluni tulliuttuni Ilulissani, Qasigiannguani Aasiannilu innuttaasunik aamma ataatsimiititsisoqassalluni.

Naalakkersuisut suliaannik anguniagaannillu tusarnaariartut 50-it missaanniipput Sisimiut TV-mi qineqqusaartitsisoqaraluartoq. Naalakkersuisut apequtini assigiinngitsuni isumaat innuttaasunit apersuutigineqartut ilaatigut tassaapput Sisimiuniit Kangerlussuarmut aqqusineq, saarullinnut qaleralinnullu akigitinneqartut, misileraalluni eqqusarniarsinnaaneq kiisalu nunatsinnut uteraanni piniarnermut aalisarnermullu allagartartaarnissamut malittarisassat qasukkarneqarsinnaanerat. Tamakkuli saniatigut aamma apersuutigineqarput soraarnerussutisiaqarnerup aaqqissuuteqqinneqarnerata imarisaa, Aatsitassanut Ilinniarfimmi ilinniakkat amerlineqarsinnaanerat minnerunngitsumillu meeqqat kinguaassiutimikkut atornerlunneqarsimasut inersimasullu kingunerlutsitsisut sullinneqarnerat.

Naalakkersuisut Siulittaasuat Kim Kielsen oqarpoq:

”Sisimiuni innuttaasut tikillugit ataatsimeeqatigisinnaasimanerat nuannaarutigaara. Oqallinneq nuannersumik ingerlavoq apeqquteqarusussuseqarluarpullu. Isumaga malillugu innutaasut tikillugit naapissinnaanerat ammasumik ingerlatsineruvoq. Taamaaliornikkut Naalakkersuisut sulinerannik toqqarlugit oqaluttuarfigisinnaavakka apeqqutillu oqariartuutillumi ingerlaannaq akisinnaallugit. Taamannak attaveqaqatigeeriaaseqarneq isumassarsiorfiulluartarpoq innuttaasullu qanoq atugaqarnerannik takutitsilluartarluni.”

Naalakkersuisuisut Siulittaasuat februaarimi aamma Maniitsumi, Kangerlussuarmi Kangaamiunilu innuttaasunik ataatsimiititsivoq. Naalakkersuisut Siulittaasuata Sisimiuni, Ilulissani Qasigiannguani Aasiannilu innuttaasunik ataatsimiititsereeruni illoqarfinnut nunaqarfinullu allanut aamma tikissamaarpoq. Pilersaarutit piareeraangata tusarliunneqartarumaarput.

Innuttaasunik ulluni makkunani ingerlanneqartussat tassaapput:

Ilulissat pingasunngornermi ulloq 8. marsi 2017 nal. 19.30 – 21.30 Majoriami.

Qasigiannguit sisamanngornermi ulloq 9. marsi 2017 nal. 19.00 – 21.00 Efterskole Villads Villadsenimi

Aasiaat tallimanngornermi ulloq 10. marsi 2017 nal. 19.00 – 21.00 Katersortarfimmi

Paasisaqarnerorusuttut attavigisinnaavaat Tusagassivimmi pisortaq Paornánguaq Kleist på mobil +299 559424 imaluunniit e-mail paok@nanoq.gl.

Sisimiuni innuttaasunik ataatsimiititsinermiit assilisat takukkit