Ny Guinea-miit Nunavut-mut: Aatsitassanut suliassaqarfimmi unammilligassat assigiipput – aammalu periarfissat assigiillutik

inerisarnissaanut, nunani allani misilittakkat qanoq atorneqarsinnaanersut Toronto-mi aatsitassarsiornermik suliaqartut ataatsimeersuarnerisa ingerlanerani sammineqarpoq.

- Allat unammilligassaat uagut unammilligassatta assigaat, oqarpoq Múte Bourup Egede, Canada-mi PDAC-mi ataatsimeersuarnermi isumasioqatigiinneeqqammersoq. Tamanna kalaallinut angalaqatigiinnut, suliffeqarfinneersut peqataasut 50-it saniatigut aamma Inatsisartut Aatsitassarsiornermut ataatsimiititaliaannit ilaasortanit pingasunit aamma peqataaffigineqartumik immikkut aaqqissuussavoq.

Taakkua sumiiffinnit assigiinngitsorujussuarnit soorlu Papua Ny Guinea-mit aamma Nunavummit aatsitassarsiorfimmik pilersitsinermit misilittakkanik tuniorarneqarput. Sumiiffiit marluk taakkua nunarsuarmi isuaniit isuanut inissisimagaluarlutik naggataatigut aatsitassarsiorfimmik aallartitsisinnaanermut aalajangiisuusuni pingasuni ukunannga assigiissuteqarput: Peqarfik naammattumik pilerinaateqartutut nalilerneqarsimassaaq, attaveqarneq pitsaasuussaaq – imaluunniit pilersinneqarsinnaassalluni – aammalu aatsitassarsiorfiutileqatigiiffiit naalakkersuisut innuttaasullu akornannanni piiaaneq aammalu iluatsitsilluarnissamik kissaateqarneq isumaqatigiissutigineqartoq takuneqarsinnaassaaq.

- Innuttaasut suliffissuillu assigiimmik soqutigisaqarnissaat pingaaruteqarpoq,Múte B. Egede oqarpoq, nunanillu tamalaaneersut saqqummiussaat nuannaarutigalugu: Pingaartumik Nunavut pillugu tusakkavut pissanganarput, tassanngaaneersut ilai Kalaallit Nunaanni takusakkatsinnit allaanerujussuupput, kisianni taamaakkaluartoq uagutsitullu unammilligassaqarput: Nunavut-mi marlunnik 1000-it sinnerlugit sulisoqartunik ingerlatsiviusunik aatsitassarsiorfeqareerpoq. Tamatuma saniatigut ukiut 1-2 tulliuttut ingerlanerini aatsitassarsiorfiit arlallit ammarneqassasut naatsorsuutigineqarpoq. Inuiaqatigiinnut isumannaatsumik aatsitassarsiornermi suliffissuaqarnermilu ineriartortitsisinnaanissatsinnut neriulluarnartumik aamma iluaqutaasumik ilinniarfigisinnaavagut paasisaqarfiginerusunnaallugillu,  Múte B. Egede oqarpoq.

- Qujanartumik takusinnaavara eqqortumik iliorluta: Maannakkut aningaasakilliornerup nalaani piareersarnissatsinnut piffissaq atorluarparput, taamaalilluta ingerlalluartoqalerpat piareersimaniassagatta. Aammalu taannarpiaavoq nunanit ukiorpassuarni aatsitassarsiorfimmik ingerlatsiviusumasunit siunnersuut pingaaruteqartoq una: Piareersimanngikkaanni allat ingerlatsinissaq tigussavaat. Taamaattumik suliffeqarfiit, kattuffiit aamma politikerit PDAC-imeeqatigisinnaagakkit nuannaarutigaara, tassani ataatsimoorluta arlalinnik aaqqissuussilluta. Nunani allani periarfissaasut assiginik periarfissaqarpugut aammalu Kalaallit Nunaat tunniussassarpassuaqarpoq. Suliffeqarfiit oqartussaasullu suli qaninnerusumik suleqatigiinnissamut akisussaaffeqarput, taamaalilluta siunissami ataatsimoorluta nukittunerusussaagatta.

 

Aatsitassanut Ikummatisanullu Naalakkersuisoq Angelina Mehta, fra Sentient Group-imeersoq, nunarsuaq tamakkerlugu aatsitassarsiorfinnik ingerlatsinermi aningaasaliisarnernik oqaluttuartoq, peqatigalugu. Sentient Group North American Nickel-ip Maniitsup eqqaani aatsitassarsiorluni misissuineranut aningaasaliisuuvoq.

 

Aatsitassanut Ikummatisanullu Naalakkersuisoq Elisabeth Kingston, Nunavut Chamber of Mining-imeersoq, Nunavut-mi aatsitassarsiornermi suliffissuit aallartitaat, peqatigalugit

 

Annertunerusunik paasisaqarusunnermi attaveqarfigineqarsinnaapput:

Jane Petersen Lantz
Naalakkesuisup allattaa - Aatsitassanut Ikummatisanullu Naalakkersuisoqarfik
tlf: 346839, e-mail: japl@nanoq.gl

Jørgen T. Hammeken-Holm
Naalakkersuisoqarfimmi pisortaaneq – Aatsitassanut Ikummatisanullu Naalakkersuisoqarfik
tlf: 346846, e-mail: joeh@nanoq.gl