Henriette Rasmussenimut eqqaaniut


Naalakkersuisuni aliatsaatigisatsinnik tusarparput Henriette Rasmussen akornatsinnikkuunnarsimasoq. Taama tusarlerneqarnitsinni pinngitsoorusunngilanga Henriettap aappaa Wilhelm Malling, qitornai marluk Inuk aamma Nunni , ernutai qatanngutaalu misiginneqataanitsinnik apuussivigissallugit.

Henriette Rasmussen Inuit Ataqatigiit arnartaanni siullersaalluni Nuup Kommuneata kommunalbestyrelsiani 1983-imi ilaasortanngorpoq. Tamatuma kingorna Inatsisartuni ilaasortanngorpoq, 1984-imiit 1995-ip tungaanut Inatsisartuni ilaasortaalluni. Henriette Rasmussen qinigaaffimmi 1991-imiit 1995-imut inunnik isumaginninnermut suliffeqarnermullu Naalakkersuisuuvoq. Naalakkersuinikkut suliaqarnermini angusaasa ilaagaat Naalagaaffiit Peqatigiit meeqqat pisinnaatitaaffiinut tunngatillugu aalajangersagaasa 1992-imiit nunatsinni atuuttussanngortinneqarneri, angusarlu tamanna meeqqat atugarisaannut tunngasunik aallussaqarusussusianut ersiutaavoq.

Nunani tamalaani nunat inuuiisa pisinnaatitaaffii pillugit ilungersuutiginnittutut Henriette Rasmussenip aamma eqqaamaneqaatigissavaa. Henrietta 1996-imi nunat tamalaat akornanni suliniaqatigiiffimmi ILO-p Genevemi qullersaqarfiani nunat inuiisa pisinnaatitaaffiinut tunngasunik sulianut atatillugu siunnersortit qullersaattut atorfinitsinneqarpoq.

Inatsisartunut 2002-mi qinersisoqarnerani Henriette Rasmussenip Inatsisartunut qinigaaqqinnermigut nunatsinni politikikkut suliaqarneq uterfigaa. 2003-mi ukiakkut Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisunngorpoq, taakkunanilu naalakkersuisuuneq 2005-imi novembarimi taasititsisoqarnissaanik suaarutiginnittoqarnissaata tungaanut ingerlappaa. Henriette Rasmussenilli inuiaqatigiinni sanngiinnerusut atugarisaasa pitsanngorsarneqarnissaanik ilungersuutiginninni aalluttuarpaa.

Atuakkiorfimmi piffissap ilaani pisortaareerluni Henriette Rasmussen Kalaallilli Nunaata Radioani aallakaatitassiortutut sulilernermigut tusagassiornermik suliaqarneq uterfigaa. Nipaa ukiorpassuarni radiukkut tusarsaajuartarsimavoq. Henriette Rasmussenip nappaat ukiuni kingullerni atugarilikkani pissutigalugu sulisinnaajunnaarnissani tikillugu ukiorpassuarni piumassuseqarluarluni sulisimanini KNR-imi naggaserpaa.

Henriette Rasmussenip politikikkuinnaanngitsoq suliumatussuseqarneranut ersiutaasut ilagaat ukiuni arlaqartuni franskit ataqqinaatilimmik nunatsinni konsuuliattut aamma sulisimanera.

Henriette Rasmussen inuit pisinnaatitaaffiinut, naligiissitaanissamut inuiaqatigiinnilu sanngiinnerusumik atugaqartut pillugit qassarissumik nipeqarluni ilungersuutiginnittarnini eqqaamaneqaatigissavaa.

Henriette Rasmussenip eqqaaneqarnera ataqqinartuugili.

 

Kim Kielsen, Naalakkersuisut siulittaasuat