Toqutsinissamik sioorasaarutit pissusilersuutaapput akuerineqarsinnaanngitsut

Naalagaaffeqatigiinnerluunniit tapersersoraluarutsigu, tamatta oqaaseqarsinnaasariaqarpugut. Ilaanneeriarlunga namminiilivinnissap AG-mi saqqummersumi namminiilivinnissamut qulartut toqunneqarnissamik sioorasaarneqartarsimasut allaaserineqarpoq. Tassunga tunngatillugu Namminiilivinnermut, Pinngortitamut, Avatangiisinut Nunalerinermullu Naalakkersuisoq  oqarpoq:

”Innuttaasut ilaat naalagaaffeqatigiinnermut tapersersuisuunertik pissutigalugu toqunneqarnissamik sioorasaarneqartarnerat pissusissamisuunngilluinarpoq. Nunami oqartussaaqatigiiffiusumi, qilersorsimaneqarata oqaaseqarfigisinnaasatsinni inuuvugut. Isummavut assigiinngikkaluartut ataqqeqatigiilluta inuussaagut, aamma sioorasaarisarneq sutigut tamatigut pissusilersorneruvoq akuerineqarsinnaanngitsoq.” 

”Tamakkiisumik namminiilivinnissaq eqqartorneqarnissaa paqumigisaasoq misigisarpara, taamaattumillu inuit isummaminnik annissinissamut qunusarlutik oqaaseqarnissaminnut imaluunniit tunuarsimaartarlutik. Namminiivinnissaq aningaasaqarneriinnarmut tunngasuunngilaq, aammali kinaassutsimut, kulturimut misigissutsinullu tunngasuuvoq. Oqallinnissaq pingaaruteqarpoq pisariaqarluinnarlunilu. Eqqartugassat mianernartut tunngaveqarluartumik torersumillu, isummavut assigiinngissutivullu ataqqillugit oqallisigisinnaasariaqarpagut,” Namminiilivinnermut, Pinngortitamut, Avatangiisinut Nunalerinermullu Naalakkersuisoq Suka K. Frederiksen oqarpoq.

”Pisariaqarpoq nunatsinni oqalliseriaaserput nalilersortuassallugu ilinniartuassallugulu, tamannami  isumaqatigiikkaanni isumaqatigiinngikkaaniluunniit pingaaruteqarpoq kaammattuerpalaartumik suleqatiserinnittumillu suliassat pitsaanerpaamik angusaqarfiussappata. Taamaaliornikkut anguniakkat oqallisissallu qimannagit pitsanngorsaataasussat nukittorsarlugit naammassineqarsinnaasammata,” naggasiulluni Namminiilivinnermut, Pinngortitamut, Avatangiisinut Nunalerinermullu Naalakkersuisoq Suka K. Frederiksen oqarpoq.

 

Annertunerusumik paasisaqarusunnermi naalakkersuisup allattaa Naasunnguaq Olsen, tlf, 345414-imut, e-mail: nasu@nanoq.gl attaveqarfigineqassaaq