Ulapikkaanni piffissaq ingerlalertortarmat!

Naalakkersuisut Siulittaasuata Kim Kielsenip Inatsisartunut ilaasortap Randi V. Evaldsenip tusagassiorfinnut nalunaarutaanut "Aallarteriarta"-mut akissutaa, AG-mi sap.ak. 9-mi ilanngunneqartoq.

Isumaga malillugu ungaserujussuanngitsukkut juullisiorlutalu ukiortaarsiorpugut. Taamaakkaluartorli Inatsisartut ataatsimiinnissaannut oqaluuserisassanik tunniussivissaq ullut 14-iinnanngoreerput. Poorskereerpat aallarteqqissuugut – Inatsisartut upernaakkut ataatsimiinnerat 2017 apriilip 20-anni aallartissammat.

Tamannarpiaq pissutigalugu Naalakkersuisut inatsisissatut siunnersuutissaat nalunaarusiallu Inatsisartunut saqqummiussassat naammassisarneqaleruttorput. Inatsisissatut siunnersuutit 20-nit amerlanerusut piareersarneqarput taakkulu saniatigut inuiaqatigiinni aningaasarsiorneq siunissamilu aningaasarsiornikkut anguniakkat oqaluuserineqarnissaannut Aningaasaqarnermik ingerlatsineq pillugu nalunaarusiaq saqqummiunneqassalluni.

Aningaasaqarnikkut massakkoqqissaaq siuariartornerup inuiaqatigiinnut iluaqutaanissaa pingaartipparput. Suliffissaaleqisut ikiliartorput, aalisarnermik inuussutissarsiuteqartut isaatitsilluarput kiisalu Namminersorlutik Oqartussat kommunillu akileraarutitigut akitsuutitigullu isertitaqarnerullutik.

Siumup, Inuit Ataqatigiit Partii Naleqqallu suleqatigiinneranni naalakkersuinikkut anguniagatta pimoorunneqarnissaat isumaqatigiissutigaarput. Inuiaqatigiinni pisariaqartinneqartut aallaavigalugit pingaarnersiuisoqassaaq.

Inatsisartut aalajangernerat aallaavigalugu namminiilivinnissaq aallartisareerparput tunngaviusumik inatsisiliornissamut isumalioqatigiissitap suliassaata aallartisarneratigut.

Inatsisartut aalajangernerattut mittarfittaassanut suliniutit aallartinneqareerput. Mittarfittaassat inuussutissarsiutit siuariartornissaannut periarfissiissapput. Tamassuma saniatigut mittarfittaassat nunarput ataqatigiissilersissavaat, innuttaasut tamaasa pillugit.

Naalakkersuisooqatigiilersuni isumaqatigiissutigaarput suleqatigiissutissatsinnik nutarterinitsigut aaqqissuusseqqinnissat nutaat ingerlanneqassasut. Suliassaqarfeqarpoq nutartertariaqarlutillu pitsanngorsartariaqartunik. Naalakkersuisut aaqqissuusseqqinnissanut pisariaqartuni pingaartitaat tassaapput aalisarneq, ineqarneq, ilinniartitaaneq kiisalu meeqqat inuusuttullu atugaasa iliuuseqarfiginissaat.

Inatsisiliornerup saniatigut Naalakkersuisuni qinigaaffimmi matumani anguniagassatut susassaqarfinni taaneqartuni aaqqissuusseqqittoqarnissaa taamaammat anguniassallugu aalajangerpugut.

Susassaqarfinni taaneqartuni iliuusissat ataasiakkaat Inatsisartut upernaaq manna ataatsimiinneranni saqqummiutissallugit naatsorsuutigaarput. Sinneri inatsisiliornissanut piareersaatit naammassigaangata Inatsisartut kingusinnerusukkut ataatsimiinnissaanni saqqummiunneqartarumaarput.

 

Ajortup biibilimik atuartarneratut ..

Maluginiarpara Demokraatinersup Randi Vestergaard Evaldsen-ip Naalakkersuisut aaqqissuusseqqinnissamut pilersaarutaannut tunngassuteqartut pillugit imminerminut allakkatigut nassuiaateqaqqusinerigalua itigartillugu qanittukkut akissuteqarfigigakku tamanna paatsoorluinnarsimagaa.

Randi Vestergaard Evaldsen-ip siusinnerusukkut Naalakkersuisuusimagami nammineerluni ilisimaqqinnaartussaagaluarpaa Inatsisartuni ilaasortat ataasiakkaat § 37 naapertorlugu apeqquteqarnerminnut atatillugu nassuiaateqaqqusillutik noqqaassuteqarnerat pissutigiinnarlugu Naalakkersuisut taamaaliortussaanngitsut.

Uanga isiginnittaasera naapertorlugu aaqqissuusseqqinnissanut pilersaarutit suliarineqartut suunersut kikkut tamarmik ilisimasassarinngilaat. Pilersaarutit tamakku tamanut saqqummiunneqarnissaat pillugu Naalakkersuisuni aalajangiussinissatta tungaanut Naalakkersuisut akunnitsinniinnaq ilisimasinnaatitaagivut isumaqarama. Aaqqissuusseqqinnissamut tunngatillugu suliat isertuussassaanngillat. Kisianni tamanut saqqummiunneqarnissaat sioqqullugu naammassillugit suliareqqaagassaapput politikikkullu oqaluuserineqaqqaarsimassallutik. Naalakkersuisullu pisinnaatitaaffigaat namminneerlutik aalajangissallugu siunnersuutiginiakkatik qaqugu qanorlu periaaseqarluni saqqummiunneqassanersut. Taamaammanuna Randi Vestegaard Evaldsen-imut nassuiaateqarnissara itigartitsissutigigiga.

Randi Vestergaard Evaldsen-ip nammineerluni siorna Naalakkersiusuugallarnermi nalaani Naalakkersuisut aaqqissuusseqqinnissamut atatilugu qanoq pilersaaruteqarnerannut tunngasumik § 37 naapertorlugu apeqquteqaateqaammut akissuteqarnerminni akissuteqarneratut:

“§37 naapertorlugu apeqquteqaat aallaavigalugu Naalakkersuisut qanoq politikkeqarnerat, aaqqissuusseqqinnissanut atatillugu suliniutaat aamma inatsisinut allannguutaasinnaasut pillugit itisilikkamik oqariartuuteqarnissara pissusissamisoorsorinngilara (…) Tassunga taarsiullugu Inatsisartut ataatsimiinnissaanni siunnersuutit saqqummiunneqartussat innersuussiffigerusunneruakka …”

Randi Vestergaard Evaldsen-ip siorna akissuteqarnermini itigartitsinerminut tunngavilersuutaasa assinginik pissuteqarlunga itigartitsigama imaanngilaq suliat uninngaannartut. Taammangilluinnarpoq. Kisianniliuna politikikkut suliniuteqarfigisavut pillugit qaqugu qanorlu periaaseqarluta saqqummiussisarnissavut nammineerluta aalajangiiffigisarusukkivut.

Imminut tuppallersaannarsinnaavunga illuatungiliuttut tungaanniit oqaatsit sakkortuut atorneqaraluartut, Demokratineersut Naalakkersuisunik suleqateqarnissaminnut soqutiginnimmata. Tamanna Inatsisartuni katersuuteqqinnissatta tungaanut qilanaarutigissavara.


Kim Kielsen, Naalakkersuisut Siulittaasuat