Aatsitassanut Naalakkersuisup aningaasaliisartut Canadami naapissavai

Múte Bourup Egede-p Toronto-mi aatsitassarsiorfiit isumasioqatigiinnissaat annertooq sioqqullugu immikkut aaqqissuussinermi aningaasaliisartut nunanit tamalaaneersut annertuut naapeqatigissava

Aningaasaliisartut aamma aatsitassarsiorfiutileqatigiiffiit toqqaannartumik oqaloqatigissavai aammalu ineriartornermut naliliinerat tusagaqarfigissallugu: Siuariartortoqarnialerpa – aammalu nunarsuarmi niuerfimmi siuariartorneq ingerlaqqilerpat, Kalaallit Nunaata tamanna qanoq iliorluni annertunerpaamik pissarsiaqarfigisinnaavaa? 

Tallimanngorpat Aatsitassanut Ikummatissanullu Naalakkersuisoq Múte Bourup Egede Canadami Toronto-mut angalassaaq, Kalaallit Nunaannit angalaqatigiit suliffeqarfiit 34-inik amerlassuseqartut angalaqatigissallugit. Siunnerfigineqartoq tassaavoq PDAC – nunarsuarmi aatsitassarsiornermi suliffissuarnut nittarsaassinerit isumasioqatigiinnerillu annersaat. Ukioq manna pissanganarluinnartoq tassaavoq nunani tamalaani aatsitassarsiorluni suliffissuaqarnerup ineriartornerata nikeriarfiusimanera malunnarmat.

- Aningaasarsiornikkut nittarsaassinermi najuunnissannut qilanaarpunga, Múte Bourup Egede oqarpoq.  Kalaallit Nunaat isumasioqatigiinnermi immikkut– Greenland Day-imik taaguuteqartumi malunnartinneqassaaq, tamanna pissaaq isumasioqatigiinnerup aallartilluavissornissaa sioqqullugu ataasinngornermi marsip arfernanni.  Aaqqissuussami tassani naalakkersusisoq nunani tamalaani aningaasaliisartunut immikkut qaaqqusanut 40-inut qaaqqusisuussaaq:

– Ukiuni aggersuni aatsitassarsiornermi suliffissuaqarnermilu inuit suliffeqarfiillu sumi aningaasaliinissamut aalajangiisinaassusillit tikillugit oqaloqatiginissaat periarfissatsialaavoq. Aningaasaliisartut Kalaallit Nunaata periarfissatut pissanganartutut pilerinartutullu isumassarsititsisumik qanimut ammasumillu oqaloqatiginissai neriuutigaara, Aatsitassanut Ikummatissanullu Naalakkersuisoq oqarpoq.

Erseqqissarpaattaaq aamma tusarnaariartorluni Toronto-liassalluni: – Oqaloqatigiinneq ammasuunerlu pingaartitaraakka, taamaattumillu misilittakkaminnik, ilisimasaminnik isummaminnillu anitserusuttunik sapinngisamik amerlanerpaanik oqaloqateqarnissaq soqutigaara. Aatsitassarsiornermut suliffissuaqarneq nunarsuarmi suliffissuaqartitsivoq aammalu allat ilinniarfiginissaat ersigissanngilarput, taama naggasiilluni oqarpoq.

PDAC-imi ataatsimeersuarneq sapaatip akunnerata tulliani pingasunngornerup tungaanut ingerlassaaq.


Ukioq manna Toronto-mi PDAC-imi nittarsaassineq, nunani tamalaani aatsitassarsiornermi suliffissuit aningaasaleeqqinnissamut sapiissuseqarnersut paasinarsisitsisussaavoq. (fotocredit PDAC)


PDAC-mi isumasioqatigiinneq Canadami aatsitassarsiornermut suliffissuarnit aaqqissuunneqartarpoq aammalu nunarsuarmi immaqa ukiumoortumik suliffissuarnut aningaasaliisartunut allanullu aatsitassarsiorluni misissuinermik piiaanermillu suliaqartunut pisartuni pingaarnerpaatut tusaamaneqarluni. Siorna 22.000-init amerlanerusut peqataapput aammalu ukioq manna amerlanerussasut naatsorsuutigineqarpoq.

Greenland Day ulloq 6. marts immikkut aaqqissuussisoqarpoq, Sulisitsisunit, Arctic Cluster of Raw Materials-imit aamma Aatsitassanut Ikummatissanullu Naalakkersuisoqarfimmit suleqatigiilluni aaqqissuunneqartumik – naatsorsuutigineqarpoq aaqqissuussinermi tassani 200-it pallillugit peqataassasut.

Múte Bourup Egedep nunani tamalaani aningaasaliisartunik toqqartukkanik ataatsimeeqateqarnera, Canada-mi danskit sinniisoqarfiat aamma Toronto-mi generalkonsulat suleqatigalugit ingerlanneqassaaq.

Paasissutissanik annertunerusunik piniarnermi attaveqarfigineqarsinnaapput:


Jane Petersen Lantz

Naalakkersuisup allattaa - Aatsitassanut Ikummatissanullu Naalakkersuisoqarfik

tlf: 346839, e-mail: japl@nanoq.gl

 

Jørgen T. Hammeken-Holm

Naalakkersuisoqarfimmi pisortaaneq – Aatsitassanut Ikummatissanullu Naalakkersuisoqarfik

tlf: 346846, e-mail: joeh@nanoq.gl