Angutit ilinniartitaanerat isiginiarneqartariaqarpoq

-Angutit ilinniartitaanerat isiginiarneqartariaqarpoq pingaaruteqarporlu Savalimmiuni Islandimilu ajornartorsiutit assingusut takussallugit taamaasillutalu suliniarnissatsinnut isumassarsiorfigalugit, Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq Doris Jakobsen oqarpoq. Naalakkersuisoq arfininngornermi kalaallit angutit pillugit kisitsisit assigiinngitsut saqqummiuppai Nunat Avannarliit Killiit Siunnersuisoqatigiivisa ukiumoortumik sammisaqarlutik ataatsimeersuarneranni Torshavnimi ingerlanneqartumi.

Sammisaqarluni ataatsimeersuarnermi immikkut sammineqarput Nunatsinni, Savalimmiuni Islandimilu angutit unamminartitaat. –”Kalaallit Nunaanni annertunerusumik ilinniarfinni ilinniartut amerliartuinnarput, taamaakkaluartorli ajoraluartumik kisitsisit takutippaat amerliartuutaasut tamangajalluinnarmik arnaasut. Angutit amerliartornerat annikitsuaraavoq” Doris Jakobsen saqqummiinermini oqarpoq.

2006-imiilli arnat GUX-imi naammassisut marloriaatinngorsimapput, angutilli affaannarmik qaffariarsimallutik.

Assigiinngissut ilinniarnerup iluinnaaniinngilaq. –”Atornerluinerup iluani angutit ajoqutigisaminnik imigassamik ikiaroornartumillu amerlanerusut atornerluisarput”, Doris Jakobsen saqqummiussivoq.

-”Unammisassanik ulikkaarpugut, maannali aallartissimalerpugut assigiinngitsunik iliuuseqarluta. Qujanartumik siunitsinni neriunartoqarpoq, soorlu nukappissat meeqqat atuarfiat naammassillugulu ilinniarlutik aallartittartut amerliartorput, tassa angutit inuusunnerit arnasulli ilinnialersaramik siuariartortoqarpoq, Doris Jakobsen oqalugiaatini naggaserpaa.

Ernereernermi sulinngiffeqarneq, angutit arnallu naligiinnerusumik atugassaqarnissaat ilanngullugu ataatsimeersuarnermi eqqartorneqarput. 

Paasisaqarnerorusuttut Naalakkersuisup allattaanut Rosa Thirsen-imut attaveqarsinnaapput, oqarasuaat 
+299 34 66 05 imaluunniit e-mailikkut: rosat@nanoq.gl