Kim Kielsen: Inuusuttut siunissartik namminneq ilusilersussavaat

Inuusuttut Inatsisartui Nuummi katersuupput. Sisamanngornermi ullaap tungaani Inuusuttut Inatsisartuisa Naalakkersuisunut Siulittaasoq Kim Kielsen aamma Namminersulivinnermut, Pinngortitamut, Avatangiisinut Nunalerinermullu Naalakkersuisoq Suka K. Frederiksen pulaarpaat Naalakkersuisullu ulluinnarni sulinerat soqutiginnilluarlutik.

Inuusuttut Inatsisartuisa suliffeqarnermut ingammik tunngassuteqartunik apeqquteqarput:

”Sulisinnaasut sulisilerniarlugit Naalakkersuisut qanoq iliuuseqarpat?”,
”Inuusuttut suliffissaqanngitsut  suliffissaqalernissaat qanoq iliuuseqarfigineqarpa?”,
”Amerligaluttuinnartut nappaateqalersarput sulisinnaajunnaarsitsisunik – qanoq iliuuseqarfigineqarsinnaappat?” aamma
”Namminersulivinniarutta aningaasat amigaatigaavut – assersuutigalugu qiperukkanik avammut tunisassiornissamut periarfissiuussisariaqanngilagut?”.

Naalakkersuisut Siulittaasuat Kim Kielsen inuusuttunut ilaatigut oqarpoq:

”Sulinerup aamma imminut inuiaqatigiinnullu pilersorsinnaanerup pingaaruteqassusaata ilikkarnissaa pingaaruteqarpoq. Angajoqqaat meeqqamik mikisuaraanerannit ilusilersueqataasariaqarput. Ilinniagaqarnissaq kajungernartuusariaqarpoq ilinniagaqarnissarsimi inuiaqatigiit pisaariaqartippaat. Ilinniagaqarnissigut nuannarisassinnik soqutigisassinnillu immissinnut suliaqarsinnaatilissaasi. Ilissimi aquut uatsinnit tigusussaavarsi. Immissinnut upperalusi qiimallusi sulissuusi eqqaamallugulu siunissassinnik namminneerlusi ilusilersuinissarsi akisussaaffigigassiuk.

Naalakkersuisut illuatungaani suliassaraat inuussutissarsiutini pingaartitatsinni aalisarnermi, takornariaqarnermi, aatsitassarsiornermi inuussutissarsiutinilu allani siuariartorfiusuni suliffissanik pilersitsinissamut atugassaqartitsilernissaq. Tamanna namminersulivinniarnitsinni pisariaqarteqisatsinnik aningaasaqarnikkut siuariartortitseqataassaaq. Piffissaq pisariaqartinneqartoq atorlugu aqqutissassinni ujaqqat ataasiakkaarlugit piiarnissaat uagut suliassaraarput siunissami namminersulivinnissamut ilissi aalajangiisinnaajumaaqqullusi.”

Inuusuttut Inatsisartuisa pulaarnerannit assit takukkit.

Paasisaqarnerorusuttut attavigisinnaavaat Tusagassiivimmi pisortaq Paornánguaq Kleist oqarasuaat +299 55 94 24 imaluunniit e-mail paok@nanoq.gl.