Danmark Camp Century-mi avatangiisinik mingutsitsinermik misissuilerpoq

Stemningsbillede af Indlandsisen

Naalakkersuisut 2014-imili Danmark qinnuigaat Camp Century-mi avatangiisinik mingutsitsineq kiisalu radiup qinngornerinik mingutsitsisoqarsinnaanera misissuiffigeqqullugu – minnerunngitsumillu eqqakkanik, Camp Century-mi qimaannakkanik saliinissamut akisussaaffik inisseqqullugu.. Mingutsitsinerup inunnut avatangiisinullu ajoqusiisinnaaneranut naliliilluarnissaq Naalakkersuisut pingaartippaat.

Danskit naalakkersuisui maanna Camp Century-mi silap pissusianik misissuinermik atortullu qimaannakkat avatangiisinut sunniutaannik naliliinermik aallartitsinissamut kiisami akuersipput. Tamatuma saniatigut saliinissamut akisussaaffiup inissinneqarsinnaaneranut periarfissat misissuiffigineqassapput. Naalakkersuisut misissuinissat pillugit danskit nunanut allanut ministeriannut allagaqarnerminni erseqqissaatigaat, Naalakkersuisut misissuinernik siunnersuutigineqartunik Danmarkip aallartitsinissaanut tapersiinerat imaanngitsoq, misissuinerni Camp Century-mi mingutsitsinerup annertussusiata paasineqarnissaat naammagineqartoq.

”Kiisami Danmark Camp Century-mi mingutsitsinermik misissuilluni aallartittussanngornera nuannaarutigaarput, kisiannili Camp Century-p eqqaani avatangiisinik peqqissutsimullu mingutsitsinerit ulorianartorsiortitsisinnaanerillu, tassungalu radioaktivitetinut tunngasut ilanngullugit tamakkiisumik paasiniaasoqarnissaa Naalakkersuisut suli piumasarigaat ersarippoq. Mingutsitsinermut akisussaasuusut saliinissaat Naalakkersuisunit suli piumasarineqarpoq”, Namminiilivinnermut, Pinngortitamut, Avatangiisinut Nunalerinermullu Naalakkersuisoq Suka K. Frederiksen erseqqissaavoq.

 

Annertunerusumik paasisaqarusunnermi attavigineqarsinnaavoq Immikkoortortaqarfimmi Pisortaq Karen Anne Arleth oqarasuaammut +299 34 54 64-imut imaluunniit e-mailimut knar@nanoq.gl.