Meeqqat atuarfianni digital-iusumik ilinniartitsinermi ataatsimoorussamik iliuusissat

Kalaallit Nunaat ukiuni makkunani sukkasuumik digitaliusumik ineriartortitsinermik aqqusaagaqarpoq. Aamma meeqqat atuarfianni suliniutit nutaat ingerlaavartumik saqqummersarput. 

Ilinniartitaanermut Aqutsisoqarfik aamma Digitalimik Sullissinermut Aqutsisoqarfik taamaattumik ataatsimoorussamik iliuusissanik aallartitsipput, meeqqat atuarfianniit kissaataasunik naammassinninniartussanik, qularnaarisussanillu pitsaasumik siammasissumillu ilisimasanik avitseqatigiittarnermik aamma katersinermik, nunatsinni tamarmi atuarfinnut ingerlatsivinnullu iluaqutaasussanik. Iliuusissanillu suliaqarneq aamma qularnaareqataassaaq ataqatigiissaarinermik pitsaanerusumik, ingerlatanik tulleriiaarinermik aamma pitsaassusissanik qularnaarisarnermik, digitaliusumik suliniutini maanna ingerlanneqartuni siunissamilu aallartinneqartussani.

Suleqatigiissitarlu oqaaseqarpoq:
”Kissaatigaarput meeqqat atuarfiannut ataatsimoorussatsinnik iliuusissanut pilersaaruteqarnissarput, digitaliusumik atuisut aamma ingerlatsisut allat peqatigalugit suliniutitsinnik katersuiviusinnaasumik, nukiit atugassagut pitsaanerpaamik iluaqutigisinnaajumallugit, periarfissallu atuartunut ilinniartitsisunullu pitsaanerpaat pilersissinnaajumallutigit, nunatsinni sumiluunniit najugaqaraluarpata. Atuartitsinermi IT tupinnartuliatut iluaqutissatut isiginngilarput, isumaqarpugulli atortorissaarut atorfissamini isumaqartuni iluaqutigineqassasoq. Ilutigisaanillu isumaqarpugut inuiaqatigiinni ineriartorneq malinnaavigisariaqartoq digitalinngoriartuaartoq aammali nunarsuup sinneranut sammisumik isiginiartariaqartoq. Digitalinngortitsiartuaarneq aamma ilisimatigut ineriartoq ingerlaqatigiissapput.”

Iliuusissanik nutaanik suliaqarneq kommunit, Ilinniarfissuaq aamma Ilinniartitaanernut Aqutsisoqarfimmi aamma Digitalimik Sullissinermut Aqutsisoqarfimmi sulisuusut qanimut suleqatigalugit ingerlanneqassaaq. Suleqatigiissitallu aamma inuiaqatigiinni iliuusissanut siunnersuutaasinnaasut tusarusuppai, meeqqat atuarfiata digitaliusup ineriartortinneqarnerani iluaqutaasinnaasut. Taamaattumik kikkulluunniit kaammattorneqarput isumassarsiaminnik taakkua ineriartornermut qanoq iluaqutaasinnaaneri pillugit nassuiaatitalerlugit Digitalimik Sullissinermut Aqutsisoqarfimmut nassiussaqartaqqullugit,

Iliuusissanut pilersaarummut missingersuusiaq naatsorsuutigineqarpoq saqqummiunneqarlunilu oqallisigineqassasoq kommunini ingerlatsivinni pisortat akornanni april-ip aallartissimalernerani.

Suliami peqataagit, ugguunalu siunnersuuteqarlutit: https://da.surveymonkey.com/r/8HDH5J5

Imaluunniit uku arlaat attavigikkit:

Deniz Gøgenur, Digitalimik Sullissinermut Aqutsisoqarfik oqarasuaat: 345628, e-mail: deng@nanoq.gl

aamma

Simon Lennert, Ilinniartitaanermut Aqutsisoqarfik, oqaruasuaat: 346296, e-mail: sile@nanoq.gl