Namminiilivinnissatsinnut utoqqaat misilittagaat pisariaqartippavut

Namminiilivinnermut, Pinngortitamut, Avatangiisinut Nunalerinermullu Naalakkersuisup Suka K. Frederiksen-ip utoqqaat peqatigiiffiat “Nuummi Utoqqaat Peqatigiit” namminiilivinnissaq pillugu oqaloqatigai

Namminiilivinnissatsinnut utoqqaat pingaartitaasa qulequttat ilagaat nunatsinni inuusuttut aamma inersimasut akornanni sulisinnaassuseqarneq. Pingaartinneqarpoq sulisinnaassuseqarlutik sapinngitsut annertunerusumik tulluusimaarutigissagivut. Meeqqat inuusuttullu annerusumik maligassiuisunik tarrarsorfeqarsinnaanissaat pingaaruteqartoq peqataasuniit saqqummiunneqarpoq taamatuttaaq oqallisissiassatut qaqinneqarluni inuussuttut qanoq suliffeqarfinnut kajungersarneqarsinnaaneri.

“Ilinniagaqarnissamut sapinngitsut tulluusimaarutigalugit takutinnerusariaqarpagut, amerlanerusut malinnaaniassammata – aammalu ilinniagaqarneq inuunerminnut nunaminnullu qanoq pingaaruteqartigisoq inuusuttut paasineruniassammassuk” akissutigineqartut ilagaat.

Ulluinnarni atukkat iserfigineqarput siunissamilu illuutitaarnissamik pilersaarusiorlugit komite-liornerit ingerlanneqartut saqqummiunneqarlutik. Ulluinnarni suliniarnerni pingaartinneqarpoq qujamasunneq atortinneqartuarnissaat naak “utoqqanngorluni ajorisassat ikigisassaangikkaluartut” pingaartillugu ajunngitsut saqqummiunneqartarnissaat oqaatigineqarpoq.

Namminiilivinnissamut ingerlaarnermi allaffissornerujussuaq “immaqa nunarsuarmi akisunerpaamik ingerlataqarnitsinni” qanoq akikinnerusumik ingerlanneqarsinnaanera ujartortariaqartoq apuunneqarpoq.

Kalaallit Nunaat namminiilivinnissamut akissaqassusaa tikinneqarpoq pingaartinneqarlunilu nunatsinni isumalluutit avammut annissorneqannginneranni naleqarnerusariaqartut.

Meeqqat amerlasuut aappariinnik naggueqatigiinngitsunik angajoqqaaqarput taakkulu ilanngullugit eqqarsaatigineqarnissaa eqqaamaneqartariaqarpoq. Oqaatsitik imaluunniit tunuliaqutitik pissutigalugit inuiaqatigiinnit kalaallinit arlaataluunniit mattunneqartutut misigisimannginnissaa pingaaruteqartoq erseqqissarneqarpoq taamatullu oqaatsivut nukittorsartuarlugit ingerlatsisoqartariaqarluni.

”Namminiilivinnissaq pillugu innuttaasut oqaloqatigalusi nassaarisariaqarparput aqqut atugassarput, innuttaasunit peqataaffigineqartoq. Oqallinnerit angerlarsimaffinni piusariaqarput misilittakkasi ilisimasasilu pisariaqartippagut. Sapinngitsut tulluusimaarutiginissaat pikkoriffiginerusariaqaripput tamanna pingaaruteqarpoq. Maligassiuilluartut pisariaqartippavut aamma maligassiuisorpassuit isiginerusariaqarpagut ilanngullugit.

Atuarnissaq pingaaruteqarpoq taamatuttaaq tapersersuinissaq, kaammattuinissaq, nersualaarinissaq aammalu aalajangiusimasinnaaneq pingaarnertut angajoqqaat avatangiisillu tamatta suliassaraarput” naggasiinermini oqarpoq, Namminiilivinnermut, Pinngortitamut, Avatangiisinut Nunalerinermullu Naalakkersuisoq Suka K. Frederiksen.

Paasissutissanik annertunerusunik piniarnermi attaveqarfigineqassaaq Naalakkersuisup allattaa Naasunnguaq Olsen, tlf, 345414, e-mail: nasu@nanoq.gl