Assartuutit motoorillit nunaannarmi atorneqartarnerat pillugu nalunaarut

Tuttunniarnermi umimmanniarnermilu qamuteralaat sisamanillu assakaasullit atorneqartarnerat pillugu APN-imiit maleruagassat inatsimmi tunngaveqartut pillugit matumuuna erseqqissaateqassaagut. 

Tuttut nujuartat illersugaanerat piniagaanerallu pillugit aamma umimmaat illersugaanerat piniagaanerallu pillugit Namminersorlutik Oqartussat nulaarutaat atuuttut 27. juuni 2013-imeersut malillugit maleruagassat imaapput:

§ 14. Assartuutit tuttunik umimmannillu malersuinermi ungoorinermiluunniit atorneqaqqusaanngillat.

Imm. 2. Assartuutinik nunami ingerlaarnermut atatillugu minnerpaamik 500 meterinik ungasissuseqarluni tuttut umimmaallu uumasut qanillineqaqqusaapput.

Nalunaarutini aalajangersakkanik unioqqutitsineq akiliisitsinermik pineqaatissiissutaasinnaavoq aamma sunngiffimmi aallaaniarsinnaanermut allagartat imaluunniit inuussutissarsiutigalugu piniarnermut allagartat piffissami killilikkami arsaarinnissutaasinnaallutik. Piffissaq killiligaq sivisunerpaamik ukiunik tallimanik sivisussuseqarsinnaavoq. 

Tuttut umimmaallu nalunaarummi malittarisassanut akerliusumik pisarineqartut Kalaallit Nunaanni pinerluttulerinermi inatsisini malittarisassatigut aalajangersakkat malillugit arsaarinnissutigineqarsinnaapput.


Paasissutissat sukumiinerusut pillugit attavigiuk:

Immikkoortortami pisortaq Amalie Jessen

E-mail: amalie@nanoq.gl

Oqarasuaat; 34 53 04