Ilinniartut angerlarsimaffianni atugarisat pitsanngorsassapput

Kalaallit ilinniartut angerlarsimaffiini atugarisat kinguarsimapput. Tamanna peqqutigalugu Ilinniartitaanermut Naalakkersuisup, Doris Jakobsenip meeqqat atuarfiat pillugu inatsisartut inatsisaannik ukiamut inatsisartut katerinnissaannut allannguutissatut siunnersuummik saqqummiussiniarpoq, taassuma sunniutiginiartussaavaa ilinniartut angerlarsimaffiini pissutsit toqqissinarnerusut pilersinneqarnissaat.

Allannguutissatut siunnersuut saqqummiunneqassaaq Meeqqat illersuisuata Tasiilaq pillugu nalunaarusiaanut aamma siusinnerusukkut ilinniartut angerlarsimaffii pillugit nassuiaat suliarineqarsimasoq tunngavigalugit, taakkua marluk ersersitsipput ilinniartut angerlarsimaffiini pissutsit annertuumik nutarterneqartariaqartut.

”Meeqqat illersuisuata Tasiilaq pillugu nalunaarusiaa atuarakku assut ilinniartut angerlarsimaffiini ilinniartut atugarisaat ernumanartoqartippakka. Ukiut tamarluinnaasa nunaqarfinni atuartut avatangiisit sungiusimasat qimattariaqartarpaat nunaqarfimminni atuarsinnaanermik periarfissaqartinneqannginnamik. Assorujussuaq pingaartippara atuartut taakkua avatangiisinik toqqissinartunik, nuannersunik aalajangersimasunillu timikkut inooqatigiinnikkullu neqeroorfigineqarsinnaanissaat taamaasillutik alliartornerminni ineriartornerminnilu toqqissillutik nammineersinnaallutillu perorsinnaaqqullugit”, taamatut ilinniartitaanermut Naalakkersuisoq Doris Jakobsen oqarpoq.

Allannguutissatut siunnersuut Naalakkersuisut kommunillu suleqatigiissinnaanerannik tassuunalu malittarisassanik ilinniartut angerlarsimaffiinut piumasaqaatinik minnerpaaffiliisinnaanerannillu periarfissiisussaavoq avatangiisit perorsaanermilu killissarititaasut aamma sulisut ilinniarsimassusaat eqqarsaatigalugit. Tamannalu atuartunut peroriartorfimmik toqqissinartumik sunneeqataasussaavoq tassuunalu atuarnermik siunissaqarnermillu pitsaanerusumik tunisisussaalluni.

 

Paasisaqarnerorusukkaanni attavigineqarsinnaasoq: naalakkersuisup allattaa Rosa Thorsen, rosat@nanoq.gl, +299 34 5702