Kitaani misileraalluni saarullinniartoqassaaq

Nunatsinni aalisariutit ningittagarsuutit kilisaatillu angivallaanngitsut sinerissap qanittuani aalisartartut nunatta kitaata avataani misileraallutik ukioq manna saarullinniarsinnaapput.

Naalakkersuisut saarulliit misileraalluni aalisarneqarsinnaasut 5.000 tonsit pisassiissutigeqqammerpaat. 

Avataani misileraalluni  saarullinniarneq Nunarsuarnit Kitsissuarsunnut pissaaq, NAFO 1B-mit 1E-mut.

Aalisartitseqatigiit ukioq manna namminneerlutik aalajangersinnaavaat saarullittatik aalisariummi suliarissanerlutigik imaluunniit nunami suliffissuarmut tunissanerlugit. 

Misileraanissamut akuersissummi piumasaqaataavoq saarullinniarfigineqartoq siammasuussasoq, aalisarfigineqartoq ataasiinnaassanngitsoq.

Saarulliit suffinerisa nalaanni apriilip aallaqqaataanit maajip 31-annut 2017-imi misileraalluni aalisartoqassanngilaq. 

Misileraalluni saarullinniarneq Pinngortitaleriffiup innersuussutai naapertorlugit aalisartoqassaaq.

Misileraalluni aalisarnissamut qinnuteqarfissaq kingulleq tassaavoq marsip aallaqqaataa 2017.

Attavigineqarsinnaavoq Emanuel Rosing, Aalisarnermut Piniarnermut Naalakkersuisoqarfimmi immikkoortortami pisortaq. Email: emanuel@nanoq.gl