Meeqqanik persuttaasarneq pillugu ilinniagaqartunik sulisunillu ilinniarsimasunik ilinniartitsineq

Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoqarfiup 2017-imi immikkut isumaginninnermut peqqissaanermullu tunngassuteqartuni sulianik ilinniagaqarsimasunik ilinniagaqartunillu ilinniartitsinerit aallartittussaavai. Ilinniartitsinikkut siunertaavoq meeqqat angerlarsimaffinni nakuuserfiusartuni alliartortarnissaasa nakuusernerullu malitsigisaanik atugaqarlutik inuusariaqartarnerisa pinaveersaartinneqarnissaannut suliamik ilinniagaqarsimasut piginnaanngorsartinneqarnissaat.

Ilinniartitsinikkut ilinniagaqartut sulianillu ilinniagaqarsimasut qanigisani persuttaasarneranik ilisimasanik ataatsimoorlunilu tunngavissanik nutaanerpaanik aamma persuttaasarnermik ajornartorsiutaasut ataatsimoorluni paasineqartarnissaannik tuniniarneqarput, taamaalilluni pisortani sulianik ilinniagaqarsimasut suliassat aaqqissuussaanikkullu inissisimanerit apeqqutaatinnagit meeqqanik persuttaasarneq pillugu suliani sumiissusersiuisarlutik akuliuttarlutillu pitsaanerusumik suleqatigiilerniassammata.

”Persuttaasarnerup akiorneqarnera inuiaqatigiit akisussaaffigaat uagullu inuiaqatigiittut ajornartorsiummut iliuuseqartussaavugut. Persuttarneqartartunut pisariaqartinneqartumik ikiorsiisarnissamut persuttaasarnerullu ingerlaartuarnerata unitsinneqarnissaanut siusissukkut sunillu suliaqarneq apeqqutaatinnagu sulissutiginnittarnerit pingaarutilerujussuupput. Taamaammat pingaaruteqarpoq sulianik ilinniagaqarsimasut persuttaasarneq pillugu suliani iliuuseqartarnissaminnut ilisimasaqarnissaat suliamullu tunngasunik atortussaqartarnissaat”, Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naalakkersuisoq Sara Olsvig oqaaseqarpoq.

Ilinniartitsinerit Naalakkersuisut 2014-2017-imi persuttaasarnermut ilioriusissaasa iliuuserineqartussanullu pilersaarutaasa atuutsinneqalernissaannut ilaapput ilinniartitsiniarlunilu sulissutigineqartunik allanik soorlu Suliniut Kattunnermik, qimarnguinni misilittakkanik paarlaasseqatigiittarnikkut aamma nammineq piumassutsiminnik sulisunik piginnaanngorsaanikkut aapparisanik annersaasarnermut akiuiniarnerup nukittorsarneqarnissaanik siunertaqartunik, ingerlatitseqqinnerullutik.

”Pingaaruteqarpoq paasissallugu angerlarsimaffimmi persuttaasarneq annertussusileruminaatsuummat assigiinngitsunik suliallit arlallit ajornartorsiutit pillugit suleqatigiinnissaat pisariaqakkajuttarluni. Ajunngeqaaq persuttaasarnermut ilioriusissatigut ataatsimut isiginninnerulluta sulissuteqartalerniaratta nutaanillu neqerooruteqartalerluta, assigiinngitsuniit ajornartorsiutit pillugit sulissutigineqarsinnaasunik”, Sara Olsvig naggasiivoq.

Aallaqqaammut Nuummi Ilulissanilu ilinniartitsisoqassaaq taakkunaneereermatami ilinniartitsisunngorniat, peqqissaasunngorniat inunnillu isumaginnittunngorniat taamatullu Inunnik Isumaginninnermut Ilinniarfik allallu. Ilinniartut siulliit aallartissapput ulloq 29. marts, Nuummi.

Persuttaasarnermut ilioriusissat 2014-2017 uani takuneqarsinnaapput www.naalakkersuisut.gl.

Annertunerusunik paasissutissarserusukkuit attaveqarfigissavat:
Immikkut siunnersorti, Torben Weyhe
E-mail: twey@nanoq.gl
Oqarasuaat 34 66 43