Naalakkersuisut isumaginninnerup iluani ajornartorsiutit pillugit kinguneqarluartussamik oqaloqatiginnikkusupput

Kommune Kujallermi isumaginninnernermut ataatsimiititaliap siulittaasua Karla Egede Bisgaard tusagassiuutitigut nalunaarummi 22. januarimeersumi allappoq, Ole Mølgaard Motzfeldt, IA sinnerlugu kommunalbestyrelsemi ilaasortaq kommunip isumaginnittoqarfiani pissutsit pillugit, Nuuk TV-kkut eqqunngitsunik uppernarsaatissaqanngitsunillu saqqummiussaqartoq. Aamma taassuma saqqummiussaanut uanga isumaginninnermut naalakkersuisutut tapersiinera Karla Egede Bisgaardip ajuusaarnartuutippaa.

Aallarniutigalugu oqaatigeqqaarusuppara, Kommune Kujallermi meeqqat atugarliortut sullinneqarneranni ajornartorsiuterpassuaqarneranik Ole Mølgaard Motzfeldtip oqaasii tapersersinnaagakkit, isumaqarpungalu ajornartorsiutit taakku kommunimi politikkikkut sulialinnit nassuerutigineqartariaqartut, ilorraallu tungaanut saattoqarnissaa siunertaralugu suleqatigiillutik suliniutinik aallartitsisariaqartut.

Kommune Kujalleq meeqqat atugarliortut sullinneqarneranni ajornartorsiortoqarnera pissutigalugu ikiorneqarnissamik qinnuteqarluni 18. april 2016-imi Isumaginninnermut Naalakkersuisoqarfimmut saaffiginnippoq. Taamaariarmat naalakkersuisoqarfiup Qitiusumi Siunnersuisarfimmi sulisut pingasut Qaqortumut Narsamullu suliartortippai, ilaatigut kommunimi suliassat pinarluinnartut suliarineqarnissaanni ikiuuttussat, ilaatigullu aamma ajornartorsiutip qanoq angitigineranik paasiniaasussat.

Siunnersuisarfimmeersut tikikkamik ilaatigut paasivaat, meeqqat pillugit Narsami suliat arlaqartut kommunip pissarsiarisinnaasimanngikkai tammarsimammata. Siunnersuisarfiup 2016-imi ukiup affaata ingerlanerani sulisut marluk arfinillillu akornannik amerlassuseqartut Qaqortumi Narsamilu sulisippai. Piffissami suliniuteqarfiusumi isumaginnittoqarfimmi sulisunik amigaateqartoqaannavissimavoq, tamatumalu kingunerisimallugu siunnersuisarfimmeersut suliassat angummatsinniarlugit isumaginnittoqarfiullu suliassanik suliaqarneranik aaqqissuussillutik sulinissaraluarminnut taarsiullugu paarlatsitullusooq sulisariaqartarsimanerat.

Kommune Kujalleq Isumaginninnermullu Naalakkersuisoqarfik suleqatigiinnissamik isumaqatigiissummik pisussaaffiliisumik 25. maj 2016-imi atsioqatigiipput, ilaatigut pineqarluni kommuni aaqqissuussaaneq pillugu pilersaarummik, suliassanik suliaqartartut suliaminnut pisariaqartumik ilitsersorneqartarnissaannik aqutsisuminnillu siunnersorneqartarnissaannik qulakkeerisumik nassiussissasoq. Aaqqissuussaaneq pillugu pilersaarut Naalakkersuisoqarfiup – nukingisaariuaraluarluni – suli tigunngilaa, soorluttaaq suleqatigiinnissamik isumaqatigiissummi immikkoortut ilaannaat kommunip tungaaniit qanoq iliuuseqarfigineqarsimasut.

Ilanngullugu oqaatigineqassaaq isumaginninnerup iluani immikkoortortanik nakkutilliisut paasisimammassuk, kommunip meeqqanik inuusuttunillu sullissinerani annertuutigut amigaateqartoqartoq, meeqqat atugarliortut inuunerannut peqqissusiannullu toqqaannartumik kingunerlussinnaasunik. Taamaammat isumaginninnerup iluani immikkoortortanik nakkutilliisut, suliassaqarfiup qanimut malinnaaffigineqarnissaa siunertaralugu januar 2017imi Kommune Kujallermut immikkut ittumik nakkutilliiartorput.

Pissutsit-uku uppernarsaatissartaat qulaani taaneqartut tunngavigalugit kommuni ajornartorsiutinik nassuerutiginneqqullugu, aaqqiissuteqarnissamillu suleqatigiittoqaqqullugu kaammattoriga.

Kommunip suliassaqarfimmi sulisunik amerlisitsisimanera immikkullu aningaasaliissuteqarsimanera Naalakkersuisut nuannaarutigaat. Tamanna ilorraap tungaanut aallarneruvoq, neriulersitsivorlu ajornartorsiutip ilungersunartuunera kommunimit ilisimaarineqartoq, aaqqiissutissanimmi ataatsimoorluta sulissuteqarnerput nangissinnaaniassavarput.


Inussiarnersumik inuulluaqqusillunga

Sara Olsvig

Annertunerusumik paasisaqarumalluni saaffigineqarsinnaavoq: Naalakkersuisup allattaa, Nina Jul Larsen Oqar. 34 66 38 E-mail: nina@nanoq.gl