KANUAANA Aalisarnermut Piniarnermullu Naalakkersuisoqarfimmut nuuppoq

Naalakkersuisooqatigiilernissamut oktobarip 27-anni 2016-imi isumaqatigiittoqarmat Naalakkersuisoqarfinni susassaqarfiit sumiinnissaat pillugit aamma nutaamik isumaqatigiittoqarpoq.

Isumaqatigiissummi Kalaallit Nunaanni Aalisarsinnaanermut Akuersissutinik Nakkutilliisoqarfiup sumut nuunnissaa ilaavoq.Naalakkersuisooqatigiilernissamut isumaqatigiissutaavoq Aningaasaqarnermut Akileraartarnermullu Naalakkersuisoqarfimmit Aalisarnermut Piniarnermullu Naalakkersuisoqarfimmut januaarip aallaqqaataani 2017-imi nuussaasoq.

KANUAANA 60-it missaanni sulisoqartup, 23,8 million koruuninillu aningaasaliiffigineqartup, ilaatigut suliai tassaapput aalisarnermik, piniarnermik aamma aallaarniarnermik sinerissap qanittuani, avataani aamma nuna allamiut aalisarnerinik nakkutiginnissalluni.

KANUAANA-p pingaarnertut suliassarai Namminersorlutik Oqartussat aalisarnermut inatsisaa aamma tamatumunnga malittarisassat naapertuuttumik qularnaatsumillu atuutsinneqarneri nakkutigissallugit, inatsisinik nunanik isumaqatigiissimanerit tunngavigalugit imaluunniit nunatta nunat tamalaat suliaqatigiiffiinut peqataanermigut imaluunniit nunat tamalaat aalisarneq pillugu isumaqatigiissutaannut ilaalernermigut atuutsitsissalluni.

KANUAANA Aalisarnermut Piniarnermullu Naalakkersuisoqarfimmit Aningaasaqarnermut Akileraartarnermullu Naalakkersuisoqarfimmut 2016-ip aallartissimalernerani nuunneqarpoq.

Attavigineqarsinnaavoq Aalisarnermut Piniarnermullu Naalakkersuisoqarfimmi pisortaq, Jørgen Isak Olsen. Email: jio@nanoq.gl