Aalisarneq piniarnerlu allatut nakkutigineqartalissaaq

Ilisimavara maani ataatsimiinnissinni aalisarnermik piniarnermillu nakkutilleeriaasissaq nutaaq suliarineqarsimasoq oqaluuserisussaagissi. Nakkutilleeriaaseq nutaaq tassaavoq unioqqutitsilluni aalisarfigineqartartut piniarfigineqartartullu misissuiffigineqarnerulernissaannik siunertalik, taama Aalisarnermut Piniarnermullu Naalakkersuisoq Hans Enoksen, Kalaallit Nunaanni Aalisarsinnaanermut  Akuersissutinik Nakkutilliisoqarfimmi sulisut ukiumoortumik ataatsimeersuarnerini januaarip 16-ianni 2017-imi oqarpoq.

Kalaallit Nunaanni Aalisarsinnaanermut Akuersissutinik Nakkutilliisoqarfimmi sulisut ukiut tamaasa ataatsimiittarput. Nakkutilliisoqarfimmi sulisut 60-it missaanniipput.

Hans Enoksenip oqalugiarnermini erseqqissarpaa nutaamik nakkutilleeriaaseq tassaasoq sumiiffiit unioqqutitsilluni aalisarfigineqarlutillu piniarfigineqartartutut ilimanaateqarnerpaat misissuiffigalugillu nakkutilliiffigineqartalernissaat. Sumiiffiit tassaallutik nakkutilliisarnissinni unioqqutitsisunik naammattuiffiginerusartakkasi, nalunaarusiassinni allassimasuusarlutik, paasissutissanik katersuiffigisimasasi, soorlu aamma aalisartut piniartullu namminneerlutik paasissutissanik katersuiffigisaasa allattuiffianni allassimasut.

Nakkutilleeriaaseq nutaaq nakkutilliinissamullu pilersaarutit pitsaasumik ilinniarsimasuunissamik misilittagaqarluartuunissamillu piumasaqaatitaqarput. Ilinniaqqinnissaq pingaaruteqarpoq ineriartortoqartuarmat aalisarnermi piniarnermilu piinnarani aammali inatsisiliornermi. Taamaattumik nuannaarutigaara tusarakku nakkutilliisussatut ukiunik marlunnik sivisussusilimmut ilinniartoqartussanngormat.

Pingaaruteqartoq alla tassaavoq nunat allamiut piujuaannartitsinissamik qulakkeerinnissimasuunissatsinnik piumasaqataat, tunisassiatsinnik nunanut allanut tunisaqartassagutta.

Matumani raajat aalisakkallu allat MSC-mik meqqilersorneri assersuutigissallugit pingaaruteqarpoq. Pingaaruteqarpoq nunat allamiut nunatsinnut tatiginnittuunissaat, upperissalluta uumassusilinnik pitsaasumik aqutsilluartuusugut, ingammik nunat eqqaamiugut Atlantikup avannaaniittut pisassanik avitseqatigisartakkagut eqqarsaatigalugit.

Nakkutilliinissamut iliusissaq pilersaarullu pisunut nutaanut sungiussiasuunissinnut pitsaasumillu suleqatiginnissinnaanermik piumaffiginnittuussaaq. Immikkoortortami suleqatigiilluartoqarpat immikkoortortaq uummarillunilu suliassanut tunniulluarsimasuussarpoq.

Piniarnermut aalisarnermullu nakkutilliisuugaluaruilluunniit aamma alapernaarsuisuugaluaruilluunniit pisunut nutaanut sungiussiasuusariaqassaatit nakkutilliinermut tunngasunik paasititsiniaanermut ikiuussinnaasariaqarlutit, nammineerlutilluunniit nakkutilliisinnaasariaqarlutit, piniarnermut aalisarnermullu tunngasuuppata tulaassanilluunniit nakkutiginnittuuguit.

Pissutsinik ullormiit ullormut allannguinianngilagut, aaqqissuussaanerli allanngortikkiartuaarneqassaaq suliassanillu pingaarnersiuisassalluta.  Paasivara ukioq manna ataatsimiinnissinni ilaatigut tamakku oqaluuserineqartussaasut, taama Aalisarnermut Piniarnermullu Naalakkersuisoq, Hans Enoksen oqarpoq.

Attavigineqarsinnaavoq Aalisarnermut Piniarnermullu Naalakkersuisoqarfimmi pisortaq, Jørgen Isak Olsen. Email: jio@nanoq.gl