Aatsitassarsiornerup ineriartortinneqarnera pillugu ataatsimut oqaloqatigiittoqarli

Citronenfjord

Aatsitassanut Naalakkersuisup aatsitassarsiornerup ineriartortinneqarnera pillugu ataatsimut oqaloqatigiinnissamik kissaateqarpoq

Aatsitassarsiornerup ineriartortinneqarnera pillugu sapinngisaq tamaat amerlasuut suleqataanissaat pingaaruteqartoq Aatsitassanut Naalakkersuisoq isumaqarpoq. Taamaattumik sapaatip akunnera kingulleq aatsitassarsiornermik soqutigisallit suliffeqarfiit, soqutigisaqaqatigiit kiisalu annikitsumik ingerlatsisut Aatsitassanut Naalakkersuisup ataatsimeeqatigai.  Aatsitassarsiorneq inuiaqatigiinnut iluaqutaasussanngortissagaanni qanoq pitsaanerpaamik ineriartortinneqarnissaanik ataatsimut oqaloqatigiittoqarnissaanik aallartitsinissaq ataatsimiinnerit siunertaraat.

Sulinerup ingerlateqqinnissaanut paasissutissat isumassarsiallu Aatsitassanut Naalakkersuisup ataatsimiinnerni pissarsiarai. Aatsitassarsiornerup iluani malittarisassat inatsisillu qanoq pitsanngorsarneqarsinnaaneri ilaatigut ataatsimiinnerni erseqqissarneqarput. Aatsitassanut Naalakkersuisup suliassaqarfimmi isumai politikkiilu pillugit peqataasut apeqquteqarsinnaasimapput. Ataatsimiinnerit takutippaat ingerlatsisut pineqartut taakku ilisimasanik misilittakkanillu pisarialinnik aatsitassarsiornerup ineriartortinnissaanut sulianut  pitsanngoriaateqartitsisinnaasunik peqartut.

Ukiuni makkunani aatsitassarsiornermik annikitsumik ingerlatsinerit amerliartuinnartillugit aatsitassarsiornermillu suliassat amerlanerusut takkussuunnerisa, inuiaqatigiinnit ataatsimut suleqatigiinnissamik pisariaqartitsineq nassataraa. Aatsitassarsiornerup oqimaaqatigiissumik ingerlanneqarnissaa anguniarlugu ataatsimut suleqatigiittoqarnissaa Aatsitassanut Naalakkersuisup pingaartippaa. Aatsitassarsiorneq oqimaaqatigiissumik ingerlanneqarnera tassaavoq, pitsaasunik atugaqartitsineq suliffissuarnit pilerinarsinnaasoq atatitsisinnaasorlu, aamma ingerlatsinerit avatangiisimik mianerinnittut innuttaasunullu tamanut iluaqutaasunik ineriartornermik pilersitsisoq. Aatsitassarsiornerup qanoq ineriartortinnissaa pillugu oqimaaqatigiisitsineq tamanna, ataatsimut oqaloqatigiinnikkut paaseqatigiinnikkullu pitsaanerpaamik anguneqarsinnaavoq.

Ataatsimiinnerit kingorna Aatsitassanut Naalakkersuisoq Múte Bourup Egede ima oqarpoq:

Nunami aatsitassat tamatsinnut pitsaasumik iluaqutaanissaa anguniagassatut sulissutigissavara. Taamaattumik oqaloqatigiinneq tunngavigalugu politikkeqarneq kissaatigaara. Taamaattumik aatsitassarsiornerup iluani ingerlataqartut arlallit peqatigalugit ataatsimiissimavugut. Aatsitassarsiornerup ineriartortinnissaanut oqallinnermi isummat tamaasa tusarnissaat pingaaruteqartoq ataatsimiinnerit takutippaat. Taamaattumik ingerlatsisut ingerlatseqatigiillu amerlanerusut oqaloqatiginissaanut qaaqqussavakka.  ”

Paasisaqarnerorusukkuit allatsiaraq Jane Petersen Lantz saaffigiuk : telefon +299 34 68 39, mobil +299 59 79 09 imaluunniit e-mail japl@nanoq gl.