Pisatit februaarip aallaqqaataanit nalunaarutigikkit

Eqqaamallugu februarip 1-aniit Sullissivik aqqutigalugu imaluunniit kommunip nittartakkatigut sullissiviani piniarsinnaanermut allagartavit nutarternissaanut 2016-imi pisatit nalunaarutiginissaat

Aalisarnermut Piniarnermullu Naalakkersuisoqarfimmi (APN) piniarsinnaanermut allagartanik tunniussisarnermut akisussaaffik kommuninut nuunneqannginneranni inuussutissarsiutigalugu piniarnermut allagartanut ukiumoortumik immersuiffissat immersoriikkat tiguneqareersut tamarmik qarasaasiamut immiunneqareerput (1.800-it ). Sunngiffimmi piniarnermut allagartanut ukiumoortumik immersuiffissat immersoriikkat 700-it qarasaasiamut immiunneqarnissaat suli sulissutigineqarpoq tamannalu februarip ingerlanerani naammassissangatinneqarlutik. Piniarnermut allagartat sukkanerusumik tigorusukkukku ”Nammineq qanoq iliuuseqarsinnaavit” ataani takuuk. 

Pisanik ukiumoortumik immersugassamik immersuinerup qarasaasiamullu immiunneqarnerup imminik nassatarisarpaa ukiumut aggersumut namminerisamik piniarsinnaanermut allagartassap nutarterneqarnera, tassa piniarnermut allagartaqarnissamut piumasaqaatinik suli naammassinnikkaanni. 

Maannakkorpiaq sunngiffimmi piniarnermut allagartanit atuuttunit tamanit pisanik ukiumoortumik immersuiffissat immersoriikkat tiguneqareersullu 2.900-put, tassa 60 %-ii qarasaasiamut immiunneqareerput taamatullu inuussutissarsiutigalugu piniarsinnaanermut allagartanit atuuttunit tamanit immersuiffissat 1.600-t, tassa 90 %-ii immiunneqareerlutik. 

Nammineq qanoq iliuuseqarsinnaavit? 

Ajuusaarnaraluartumik suli inuppassuaqarpoq ukiumoortumik immersugassamik qarasaasiamut immiussisimanngitsunik tassanilu pineqarlutik sunngiffimmi piniarnermut allagartat 1.700-t missaanniittut aamma inuussutissarsiutigalugu piniarnermut allagartat 200-t. Tassa imaappoq inuit amerlangaatsiartut, piniarnermut allagartassaminnik nassiussiffigineqassanngillat ukiumoortumik immersugassaat imminut sullissivimmi www.sullissivik.gl-imi immiutereersimatinnagit. Imaluunniit kommunip nittartakkatigut sullissivianni alipi.gl kommunit sullissiveqarfianni imaluunniit inuussutissarsiutigalugu siunnersortaa aqqutigalugu. 

Imminut sullissinermut www.sullissivik.gl. iserlutit imaluunniit kommunimut saaffiginnillutit piniarnermut allagartassat sumut killinnersoq takusinnaavat: 

  • Suliarineqareernersoq - taamaappat inuit nalunaarsorsimaffiat malillugu najugarisannut nassiunneqareersimassaaq. 
  • Pisanik nalunaaruteqarneq amigaataanersoq - taamaappat pisatit qarasaasiamut immiukkukkit nutarterinissamullu kryds-iliiguit taava piniarnermut allagartassaq nutaaq angerlarsimaffinni nammineq anisissinnaassavat imaluunniit kommunip nittartagaatigut anisillugu. 
  • Inatsimmi piumasaqaatit tamakkerlugit naammassineritit - innuttaasut inatsimmi piumasaqaatinik naammassinninngitsutut nalunaarfigineqartartut sumiiffimmi sullissivimmukartassapput imaluunniit inuussutissarsiornermut siunnersortimut tassanilu akineqarsinnaassapput immikkullu akuersissuteqarnissamik qinnuteqarnissamut siunnersorneqarsinnaassallutik. 


Paasissutissat sukumiinerusut pillugit attavigiuk: Immikkoortortami pisortaq Amalie Jessen, oqarasuaat: 34 53 04, email: amalie@nanoq.gl