Qilalukkanik qaqortanik qernertanillu illersuinermik piniarnermillu nalunaarut nutaaq

Qilalukkat qaqortat qernertallu illersorneqarnerat piginiagaanerallu pillugit nalunaarut nutaaq januaarip 26-ani 2017 Naalakkersuisunit akuersissutigineqarpoq.

Qilalukkanik qaqortanik qernertanillu nalunaarut nutaaq piffissami septembarip 9-aniit oktobarip 14-anut 2016 tamanut ammasumik tusarniutaanikuuvoq.

Allannguutit

Nalunaarummi nutaami allannguutit pingaarnerit tassaapput:

Piniagassanut pisassiissutinik aalajangersaaneq aamma piniakkat killeqarfii aallaavigalugit piniarfinnik aalajangersaanernik kapitalinik immikkoorsitsineq.

Siusinnerusukkut nalunaarummi atuuttumi paatsuuisarsimanerit aallaavigalugit suliaavoq, APN-ip nalilermagu ilannguttariaqartoq, siunissami pingaartumik qilalukkat qernertat piujuaannartitsinissamik tunngaveqarluni piniarneqarnissaat qulakkeerumallugu.

Kommunit akuersissummik ataasiinnaanngitsumik tunniussisinnaalernissaanut pisinnaatitaaffeqalersitsineq.

Nalunaarut nutaami kommunit ataasiinnaanngitsumik akuersissummik tunniussisinnaalernissaanut pisinnaatitaalissapput, taava piniarnermi ataatsimi piniartoq qilalukkanik amerlanernik pisaqarsinnaatitaalissooq, akuersissutit amerlassusaat naapertorlugu.

Aqutsiveqarfinni tamani illoqarfiit nunaqarfiillu tamarmik pisassiissutaasunik agguaassisinnaaneq.

Sumiiffinni ataasiakkaani pisassiissutinik nunguutsisarneq pinaveersaartinniarlugu kommunit maannakkut illoqarfiit nunaqarfiillu tamarmik pisassiissutinik agguaanneqartassapput.

Qimusseriarsuarmi uumasunik eqqissisimatitsivimmi piniarnermut malittarisassanik erseqqissaaneq.

Qimusseriarsuarmi uumasunik eqqissisimatitsivik pillugu Namminersornerullutik Oqartussat nalunaarutaat nr. 21 ulloq 17. maj 1989-imeersumik nalimmassaaneq.

Qilalukkanik qaqortanik qernertanillu piniarnermut atorneqarsinnaasuni akuerisaasumik takinerpaamik angallatit takissusissaatut uuttuisimanerup 14 meteriniit tamakkiisumik takissusaa (t.t.) 15 meterimut t.t.-mut allanngortitsineq.

Politikkikkut kissaatigineqartoq. 14 meteriniit t.t. 15 meterimut t.t.-mut allanngortitsineq kinguneqassaaq angallatit amerlanerusut taamalu piniartut amerlanerit qilalukkanik qaqortanik qernertanillu, taakku pingaartumik Avannaani Tunumilu piniakkanit pingaaruteqarnerpaat ilaannut, piniarnermut peqataasinnaalissapput.

Aqutsiveqarfinni arlalinni pisassiissutinit tamakkerlugit silarlunnera pissutigalugu angallatinit mikinerusunit angallavigineqarsinnaanngitsumi pisarineqanngitsoorneqartartunit annertunerusumik iluaqutiginnissinnaaneq anguneqarsinnaavoq. Taamaasilluni aamma najukkami inuiaqatigiinnut aningaasaqarnikkut pilersuinikkullu annertunerusumik iluanaaruteqarneq.

Tunumi 15 % tikillugu pinialuttartunut tunniunneqarsinnaassaaq.

Politikkikkut kissaatigineqarsimavoq Tunumi sunngiffimmi pinialuttartut annertunermik agguaanneqartarlissasut.

Piniarsinnaanermut akuersissutinut kiisalu ataatsimoorluni piniarnermut malittarisassanik erseqqissaaneq.

Taanna ataatsimoorluni qilalukkanik qaqortanik qernertanillu piniaqatigiinnermut sukumiinerusumik malittarisassiuussivoq.

Nutarterinermi teknikikkullu tunngasutigut allanngortitsinerit.

Allannguutit siunnersuutigineqartut sinneri, oqaaseqatigiinnik aaqqissuussaanikkut kiisalu oqaasertaliussanik allannguinerupput annikitsut, nalunaarutip imaanut allanngortinneri sunniuteqartumik kinguneqartussaanngitsut.

Taamaasilluni Qilalukkanik qaqortanik qernertanillu illersuineq piniarnerlu pillugit Namminersorlutik Oqartussat nalunaarutaat nr. 1, 15. januar 2016-imeersoq atuukkunnaarpoq, inatsisillu nutaat ullumi januaarip 26-ani 2017 atuutilerput.

Taamatut sivikitsigisumik marloriarluni iluarsaassinernut pissutaasoq unaasimavoq, kingullermik iluarsaassineq januar 2016 aallartilersoq ingerlanneqartoq pisariaqarsimammat biologinit siunnersuineq nutaanerpaaq ukiumit piniarfiusumit 2016-imiit atortuulersinnaanissaa pissutigalugu. Maannakkut iluarsaassineq qilalukkanik qaqortanik qernertanillu nalunaarummit tamarmiusumit tamakkiisumik iluarsaassineruvoq.

Nalunaarut nutaaq uani aaneqarsinnaavoq www.naalakkersuisut.gl aamma www.inatsisit.gl.

Paasissutissat sukumiinerusut pillugit attavigiuk:

Immikkoortortami pisortaq Amalie Jessen, email: amalie@nanoq.gl, oqarasuaat: 34 53 04