Uummasuuteqarnermik inuussutissarsiuteqartut pissarsiaqarfiunerusumik ingerlatsinissaq oqallisigaat

Nunalerinermi isumasioqatigiinneq peqataaffigineqarluartoq sapaatip akunnerata naalernerani Qaqortumi ingerlanneqarpoq

Nunalerineq pillugu isumasioqatigiinnermi aningaasaqarnikkut imminut napatissinnaasumik, ullutsinnut naleqquttumik minnerunngitsumik sunniuteqarluartumik pilersitsinissamut qanoq iliortoqarsinnaanersoq sammineqarpoq.

Isumasioqatigiit aggulullutik suleqatigiikkuuttarlutik qanoq piumasaqaateqartoqartariaqarnersoq qanorlu siunnerfeqartoqartariaqarnersoq siunnersuuteqarnissamut  periarfissinneqarput.

Namminiilivinnermut, Pinngortitamut, Avatangiisinut Nunalerinermullu Naalakkersuisup Suka K. Frederiksen-ip saqqummiinermini erseqqissarpaa ”tapeeriaatsit naleqqussarnissaat pisariaqartoq, taamaalilluni politikerit inuussutissarsiuteqarlutillu ingerlataqartut namminneerlutik anguniakkanut kajumissuseqalersitsinerusumik ingerlatsisoqarsinnaalerlugu. Siunnerfiit tassaapput inuussutissarsiortut siumukarfiusumik ingerlatsiviunissaat aammalu  sapinngisamik imminut napatissinnaanerulernissaat”. Nunalerinermut siunnersuisooqatigiit,  nakkutilliinermullu siunnersuisooqatigiit nukittorsarnissaannik kiisalu allaffissornermi atorluaanerusumik ingerlatsinissamik, Naalakkersuisut pilersaaruteqarput.

Isumasioqatigiinnermi suliassat unammilligassat nunaateqarnerup iluaniittut oqallisigineqarput. Nunalerinerup iluani ”siumukarfiusumik” ingerlaqqilernissaq, inuussutissarsiornerup naleqqussarneqarnissaa pisariaqartinneqarpoq, aammalu nunalerinermik inuussutissarsiortut nukittorsarneqarnissaannut sunniuteqarluarnerulersinneqarnissaannullu, siunnersuisarnerup ilinniartitaanerullu pitsaanerunissaat kissaatigineqartoq, peqataasut ilaatigut oqallisigigaat maluginiarneqarpoq. Inuussutissarsiuteqartut arlallit nunaateqarnerup iluani misileraanernut nutaamillu eqqarsarnissamut aningaasaliisoqarsinnaanissaanik kissaateqarput.

”Nunalerineq pillugu isumasioqatigiilluartoqarpoq nunalerinermilu inuussutissarsiuseqartut misilittagaat, isumanerluutaat aammalu pitsanngorsaanissamut isumassarsiaat Naalakkersuisut anguniagaannut naapetuulluartut tusarnaarsinnaagakkit nuannaarutigaara. Peqataasut piumasaqaatinik siunnerfinnillu siunissami ornittariaqakkanut pisariaqartunut, namminneerlutik siunnersuuteqarlutik saqqummiinerat pingaaruteqarpoq. Suleqatigiinneq aqqutissaavoq,” oqarpoq Nunalerinermut Naalakkersuisoq Suka K. Frederiksen.

Nunalerinermi isumasioqatigiinneq Savaatillit Peqatigiiffiit Suleqatigiissunit (SPS) aamma Kommune Kujallermit aaqqissuunneqarpoq.

Annertunerusumik paasisaqarusunnermi Naalakkersuisumut allatsi Naasunnguaq Olsen, +299 34 54 14, e-mail: nasu@nanoq.gl attavigineqassaaq.