Namminiilivinnissaq innuttaasut aalajangigassaraat

Namminiilivinneq pillugu Qaqortumi sisamanngornermi innuttaasunut ataatsimiititsisoqarpoq. Eqimattakkaat pingaartitaasa ilagivaat pikkoriffigut samminerusalertariaqarigut, immitsinnut piumaffiginerulerulernissarput kiisalu innuttaasut tassaasut aalajangiisussat qaqugu namminiilivinnissaq eqqunneqassasoq.

Qaqortumi eqqartorneqartut ilagaat: imminut pilersorneq, ilinniartitaaneq, nunatta pissarititai (innuttaasut, uumassusillit uumaatsullu), aningaasaqarneq, inuiattut pisinnaatitaaffigut taavalu inuiaqatigiitsinni ajortorsiutit aaqqinneqarnissaat.

Innuttaasut akornanni nutaatut inissialiornerit nunaqavissunik sulisitsisoqarluni sulisoqarnissaq, taavalu sapinngisamik nunatta pissarititai nunatsinni suliareqqinneqaqqaartillutik naleqalernerulerseriarlugit Kalaallit Nunaanniit avammut anninneqartassasut pingaaruteqartutut eqqartorneqarput.

Naggasiutigalugu Namminiilivinnissamut Naalakkersuisup oqariartuutigivai assigiinngissuseq nukittoqutitut isigissagipput. 

”Politikki tassaavoq isummanik naapiffiusussaq” oqarpoq Naalakkersuisoq. Innuttaasunik ataatsimiititsineq naggasiutigalugu taallaq Qajaq issuaaffigaa, imalu oqaatsini naggaserlugit:”Sapilissanngilaq - Qunulissanngilaq.”  


Annertunerusumik paasisaqarusunnermi naalakkersuisumut allatsi Naasunnguaq Olsen, +299 34 54 14-mut, e-mail: nasu@nanoq.gl  attaveqarfigineqassaaq.