Allanngoriartortitsinissamut pikkorissaaneq

Innuttaasut allanngoriartortitsinissamut kajumissuseqalersinnissaannut kommunini suliassanik suliarinnittartut pikkorissartinneqarput

Innuttaasut, assersuutigalugu siusinaartumik pensionisiallit imaluunniit siusinaartumik pensionisiaqalernissamik qinnuteqarsimasut, oqaloqatiginissaannut, aammalu taakkua assersuutigalugu piginnaanngorsaqqillutik, ilinniaqqillutik aammalu atornerluinerminnik katsorsartillutik allanngoriartortitsinissamut kajumissuseqalersinnissaannut, qanoq iliorlutik pikkorinnerulersinnaanerlutik, suliassanik suliarinnittartut kommunini isumaginnittoqarfinneersut 35-it missaanniittut pikkorissaqqammerput.

”Kajumissuseqalersitsiniarluni oqaloqateqarneq” pikkorissaaneq Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoqarfimmit ingerlanneqarpoq, kommunit tamarmik peqataatitaqarlutik.

Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoq Sara Olsvig pikkorissaanermut atatillugu oqarpoq, ”Pikkorissaavugut pissutigalugu suliassanik suliarinnittartut innuttaasut naapillugit sulinerannik nukittorsaarusukkatta” aammalu innuttaasut inissisimanerannik unammilligassaannillu qulaajaallutik aammalu neqeroorutinik suliniutinillu, innuttaasunik inuunerminni ingerlaqqinnissaannut iluaqutaasinnaasunik nassaarniarnermi, suliassanik suliarinnittartut suliassaat innersuussutigalugit. Suliassanik suliarinnittartoq suliap ingerlanera tamaat innuttaasunik kajumissuseqalersitsisussaavoq.

”Taamaattumik innuttaasut naapillugit oqaloqatigalugillu sulinissaq suliassanik suliarinnittartunut ataasiakkaanut annertuunik piumasaqaateqarfiuvoq, pingaartumik ”oqaloqatigiinnerni ajornakusoortuni”. Innuttaasut assigiinngitsunik unammilligassaqarput, taamaattumillu aamma neqeroorutinik suliniutinillu assigiinngitsunik pisariaqartitsisarlutik. Pikkorissaanermi suliassanik suliarinnittartut innuttaasut naapinneranni nutaanik sakkussaqalersinneqarput aammalu oqaloqateqariaatsinik pikkorissarneqarlutik. Innuttaasut inuunerminni ingerlaqqinnissaannut isumaginninnikkut suliniuteqarnitsinni tamanna nukittorsaataavoq”, oqarpoq Sara Olsvig.

Periaaseq ”Kajumissuseqalersitsiniarluni oqaloqateqarneq”, peqqinnissaqarfimmi aamma atorneqartoq, suliassanik suliarinnittartut innuttaasunik oqaloqatiginninnissamut pikkorinnerulernissaannut aammalu taakkua allanngoriartortitsinissamik kajumissuseqalersinnissaannut, oqaloqateqariaatsinut sakkussanik arlalinnik aamma periaatsinik imaqarpoq. ”Kajumissuseqalersitsiniarluni oqaloqateqarneq” periaasiuvoq akuerisaasoq, innuttaasut isiginnittaasiat, kissaataat anguniagaallu tunngavigalugit kajumissuseqalersitsinissamik suliaqarnermik aallaaveqartoq. Periaatsimi suleqatigiinneq, akuersaarneq, isumassuineq aammalu innuttaasumi allanngoriartortitsinissamut kajumissuseqalersitsinissaq, pingaartumik pingaartinneqarput.

 

Paasissutissanik annertunerusunik piniarnermi attaveqarfigineqassaaq fuldmægtigi Niels Thomas Andersen, nita@nanog.gl