Julie Ilulissanilu atuartut Qujanaq pillugu tusarnaartitsilersut

Julie aamma Ilulissani atuartut Qujanaq pillugu tusarnaartitsinerannut tusarnaariarit

 

Qujanaq pillugu tusarnaartitsinermut aggerit aammalu Julie Berthelsen Atuarfik Jørgen Brønlund-imi 6. klassit peqatigalugit tusarnaartitsisoq tusarnaariarlugu.

Tusarnaartitsineq pissaaq ataasinngorneq ulloq 30. januar Ilulissani Kulturip Illorsuani Sermermiuni. Tusarnaartitsineq aallartissaaq nal. 19.00. Kikkut tamarmik tikilluaqqusaapput aammalu iserneq akeqanngilaq.

Erinarsuummut Qujanaq-mut taallanik nutaanik allalluni unammisitsinissaq Namminersorlutik Oqartussat ukiarmi nalunaarutigaat. Kalaallit Nunaata paarilluarnissaa pingaaruteqartoq taallani imaritinneqassaaq. Siunnersuutit 100-it sinnerlugit tiguneqarput, aammalu taallat ajugaasut maannakkut erinarsuummi Qujanaq-mi ilisimaneqarlualersumi ilanngunneqarput.  Taamaattumik unnuk allaanerusoq aammalu nipilersorfiulluni nuannersoq peqataaffigiartoruk. Aggialluarisi!

Aaqqissuussineq Namminiilivinnermut, Pinngortitamut, Avatangiisinut Nunalerinermullu Naalakkersuisoqarfimmit ingerlanneqarpoq.

 

Annertunerusumik paasisaqarusunnermi takusarneqarsinnaavoq Qujanaq facebook-imi quppernera imaluunniit attaveqarfigalugu Naalakkersuisup allattaa Naasunnguaq Olsen, oqarasuaat: 52 36 84 imaluunniit e-mail-ikkut: nasu@nanoq.gl