Qinnuteqaatit kommuninnut nassiuguk

Umiatsiaararsorluni aalisarsinnaanermut akuersissutit nutartertinniarukku imaluunniit piniarnermut allagartat kommunerisannut nassiutissavat, Aalisarnermut Piniarnermullu Naalakkersuisoqarfimmut nassiunnagu.

- Umiatsiaarsorluni aalisarsinnaanermut akuersissutinik aamma piniarnermut allagartanik qinnuteqartunik Aalisarnermut Piniarnermullu Naalakkersuisoqarfik maannamut suli nassisoqartuarmat, matumuuna erseqqissarusuppara akuersissumminnik imaluunniit allagartaminnik peqareerlutik nutaanngortitsiniartut kommuniminnut saaffiginnillutik piniarsinnaammata, Aalisarnermut Piniarnermullu Naalakkersuisoqarfimmi immikkoortortami pisortaq, Pollas Lyberth erseqqissaavoq.

Inuussutissarsiutigalugu piniartut imaluunniit sunngiffimmi piniartut kommunerisaminnit allagartamik februaarip aallaqqaataanit erngertumik tunineqarsinnaanngussapput. Piniarnermut allagartaq namminneerlutik www.sullissivik.gl-ikkut imaluunniit kommuniminnut saaffiginnillutik, inuussutissarsiornermut siunnersortimut nunaqarfimmiluunniit kommunip allaffianut saaffiginnillutik pisinnaalissavaat.

Piniarnermut allagartamik nutaamik ukiumoortumik nalunaarsuiffimmut ilanngullugu qinnuteqaqqittut, aatsaavissuarluunniit allagartartaarniarlutik qinnuteqartut taama pisinnaallutik.

Sinerissap qanittuani umiatsiaararsorlutik aalisartut aalisarsinnaanermut akuersissummik kommuniminnut februaarip aallaqqaataanit aamma qinnuteqarsinnaalissapput.

Aalisarsinnaanermut akuersissut namminneerlutik www.sullissivik.gl-ikkut imaluunniit kommuniminnut saaffiginnillutik, inuussutissarsiornermut siunnersortimut nunaqarfimmiluunniit kommunip allaffianut saaffiginnillutik pisinnaalissavaat.

Sinerissap qanittuani aalisarsinnaanermut akuersissut qaleralinniarnermut, saarullinniarnermut, nipisanniarnermut aamma kapisilinniarsinnaanermut atorneqarsinnaavoq.

Attavigineqarsinnaavoq Aalisarnermut Piniarnermullu Naalakkersuisoqarfimmi immikkoortortami pisortaq, Pollas Lyberth. Email: poly@nanoq.gl