Innuttaasut silarlukkaluartoq soqutiginnilluarput

Naalakkersuisut Børne- og Socialministereqarfik peqatigalugu innuttaasunik marlun­ngornermi 24. januar 2017 ataatsimiisitsipput. Nuuk silarlukkaluartoq innuttaasut 20-t missaanniittut aggerput. Ataatsimiisitsineq, inatsisitigut ataataqanngitsuulluni peroriartornermi nalaassimasat pillugit ammasumik eqqartuisoqarsinnaaqqullugu tusagassiuutinut matoqqasumik ingerlanneqarpoq.

Innuttaasunik ataatsimiisitsineq paasisitsiniaanermik suliniummut, Folketingimi Grønlandsudvalgip pisinnaatitaaffiit nutaat 2014-imi atortuulersinneqarmata aallartinneqartussatut inassutigisaanut ilaavoq. Inatsisitigut ataataqanngitsut qanoq amerlatiginerat paasisitsiniaanermik suliniutip saniatigut paasiniarneqarpoq, aammalu inunnut sunik sunniuteqartarneranik qulaajaanerup inernerata aasamut tamanut saqqummiunneqar­nissaa naatsorsuutigineqarpoq. 

“Aggiasoqarluarnera nuannaarutigaara. Maanna suliniuteqaqqilernerput pisariaqartinneqartoq paasilluinnarpara. Suliassamik imminerminnut tunngasumik kredsrettini suliassanngortitserusuttut tamarmik sumut saaffiginninnissaminnik paasinninnissaat qulakkiissavarput. Kiisalu inatsisitigut ataataqanngitsunut eqqunngitsuliorfiginnissimanerup inunnut sunik kinguneqarsimanerata maanna qulaajaaffigineqarnera pingaartorujussuuvoq” naalakkersuisoq Sara Olsvig oqarpoq.

Børne- og socialministereqarfiup inatsisitigut ataataqanngitsut 8000-it missaannik amerlassuseqassangatippai. Naalakkersuisoq Sara Olsvig itisiliivoq: ”Isumaqarpunga pi­simasoq inuiaqatigiittut suliareqqissallugu aaqqiissuteqarfigissallugulu pisussaaffigigipput. Taamaammat Børne- og Socialministereqarfiup, inatsisitigut ataataqanngitsuunerup inunnut sunik sunniuteqarsimaneranik qulaajaanerata naammassineqarnissaa qilanaaraara”. 

Ilulissani innuttaasunik ataatsimiisitsinissaq kulturip illorsuani Sermermiuni pissaaq sisamangornermi 2. februar kl. 19-21. Innuttaasut soqutiginnittut tamarmik aggernissaat naalakkersuisoqarfimmit kajumissaarutigineqarpoq. Ilulissani innuttaasunik ataatsimiisitsinissaq Nuummisuulli tusagassiuutinut matoqqasumik ingerlanneqassaaq.

Tusagassiuutit annertunerusumik oqaaseqartitsiumagunik Naalakkersuisumut Sara Olsvigimut saaffiginnissinnaapput.