Akisusaaqataaniaritsi – eqqortumillu issuaasarlusi

Sukaterineq aamma siorasaarineq oqaasiupput assigiinngilluinnartunik isumallit.

Tupigusuutigilluinnarpara nunatsinni partiip ataatsilluunniit aamma kattuffiulluunniit nalunaarutigisannut tassaasumut: “ kilisaatit anngiortumik ikiaroornartunik unioqqutitsillutik eqqusseriarnermi atorneqartassappata, Naalakkersuisut aalisarsinnaanermut akuersissutinik pisassanillu tunniussisarnerup sukateriffigineqarnissaanik sukaterissallutik siunniussaqarput” tapersersuinngimmata. 

Aamma misigisimavunga nunatsinni tusagassiorfiit saqqummiussara sangutinniarsarigaat, tusagassiuutinut januaarip 23-anni saqqummiussara qulequtaqartoq: “Ikiaroornartumik kilisaatitigut assartuussineq akuerinngilara”, tusagassiortunit paasiniaqqissaarneqarsimannginnera uggornarluni.

Tusagassiutinut nalunaarummi oqaatsimik ataatsimilluunniit allassimasoqanngilaq kilisaataatillit ikiaroornartumik assartuinnassappata akuersissutiminnik imaluunniit pisassaminnik annaasaqassasut, erseqqissumilli allassimasoq tassaavoq kilisaatit Naalakkersuisut aalisarsinnaanermut akuersissutinik pisassanillu tunniussisarnerup sukateriffigineqarnissaanik sukaterissallutik siunniussaqassasut. 

Nittartakkakkut nutaarsiassaqartitsivik Sermitsiaq.AG allaat ima qulequtalimmik , januaarip 24-anni 2017-imi, allappoq: “Enoksen aalajangiusimasoq - akuersissutinut sioorasaarut attakkaa”.

Oqaaseqatigiit tassaasut akuersissutinut sioorasaarut attakkaa, takutippaa saqqummiussannut sangutitsiniaalluni allattoqartoq, atuartartut isumaliortinneqalissallutik kilisaataatillit eqqunngitsumik iliunngippata pisassaannik arsaarinnittoqarniartoq – uffa taamaaqqajanngilluinnartoq.

Aamma KNR.gl ulloq taanna ima qulequtalimmi allappoq: Polar Nanumi inuttat Enoksen isornartorsiorpaat ” Hans Enoksenip kilisaatini hashimik nassaartoqassagaluarpat kilisaataatileqatigiiffiit aalisarsinnaanermut akuersissutaannik pisassiissutinillu arsaarneqarnissaannik sioorasaarinerata kingorna Polar Nanumi inuttat tamanut ammasumik ilaatigut taama allagaqarput.” Matumani erseqqissaannassavara nutaarsiassaqartitsivik aamma ima oqartunut ilaatimmanga kilisaataatillit siorasaarikka aalisarsinnaanermut akuersissutissaannik pisassaannillu arsaassallugit. 

Demokraatit inatsiseqarnermut oqaaseqartartua Michael Rosing KNR.gl.-imi januaarip 23-anni 2017-imi  isornartorsiorpaanga oqarluni (qallunaatuaani) kilisaataatillit inuttai anngiortumik ikiaroornartumik eqqussippata, kilisaataatillit pisassiissutinik tunineqartassanngitsut. Taanna aamma  nalunaarutinnut kingumut paatsuuinerullunilu sangutitsiniaaneruvoq.

Nalunaarutiga kingumut erseqqissaassutigeqqissavara, tassaasoq kilisaatit anngiortumik ikiaroornartunik unioqqutitsillutik eqqusseriarnermi atorneqartassappata, Naalakkersuisut aalisarsinnaanermut akuersissutinik pisassanillu tunniussisarnerup sukateriffigineqarnissaanik sukaterissallutik siunniussaqartut. 

Neriuutigeqaara partiit kattuffiillu nalunaarutiga paasilluarumaaraat, tassaasoq nunatsinnut anngiortumik ikiaroornartumik eqqussinerujussuup nakkutigiuminaannerata aaqqiivigineqarnissaa.

Nalunaarutiga akiuinnarnagu pineqartut nalunaarutinnut tapersiinerusariaqaraluarput, ikiaroornartup ukiuni kingullerni atugaaleriartuinnartup akiorniarneranut ataatsimut katulluta qanoq aaqqiisinnaanissarput pillugu saqqummiussaqarsinnaasariaqarlutik.

Attavigineqarsinnaavoq Aalisarnermut Piniarnermullu Naalakkersuisoqarfimmi pisortaq, Jørgen Isak Olsen. Email: jio@nanoq.gl