Kalaallit inuttaasariaqarput

Kalaallit aalisariutaataanni inuttalersuisarneq pillugu Namminersorlutik Oqartussat nalunaarutaat 2011-meersoq naapertorlugu immikkut akuersissuteqartitsilluni inuttalersuineq pillugu malittarisassanik akuersissuteqartarneq atorunnaartariaqarpoq, Aalisarnermut Piniarnermullu Naalakkersuisoq, Hans Enoksen oqarpoq.

Nalunaarummi allassimasut naapertorlugit aalisariummi 24 meterinit angitigisumi inuttat ikinnerpaamik 60 procentii Kalaallit Nunaanni najugaqartutut inuit nalunaarsorsimaffianni nalunaarsimasuussapput, Kalaallit Nunaannilu inuit aqqisa nalunaarsorsimaffianni qaammatisiutit ukiuini kingullerni marlunni nalunaarsorsimassallutik.

Inuttat aamma Kalaallit Nunaannut tamakkiisumik akileraartartussaallutik, Kalaallit Nunaannilu tamakkiisumik qaammatisiutit ukiuini kingullerni marlunni akileraartartussaatitaasimassallutik.

Inuttat pineqartut tassaapput aalisariutip naalagaa, aquttoq, igasoq/pilittaq, qaavani sulisut naalagaat, suliffissuarmi pisortaq aamma suliffissuarmi aqutsisoq.

Nalunaarummi allassimasut naapertorlugit kilisaataatilinnut immikkut akuersissuteqartarnerput killeqartariaqalerpoq, nunat allamiut aalisartui aalisariutini nunatsinneersunut inuttaatittassallugit, nalunagu nunatsinni inuusuttoqartoq kilisaatini inuttaakutsoorsinnaasunik.

Isumaqarpunga aalisartitsinermik aallussaqartut imarsiornermik ilinniarfik suleqatigalugu qaammarsaasariaqartut, ilaatigut qaammarsaassutigineqarluni ilinniarfimmi aalisarneq pillugu, fiskeriassistentitut, ilinniartoqarsinnaasoq. Ilinniarneq naammassippat kilisaatini inuttaalersoqarsinnaalluni.

Kalaallit aalisariutaataanni nunanit allaneersunik inuttaqartitsinngikkaluarluni aalisarnissamut tamanna siunissamut aqqutissaavoq pitsaasoq, Hans Enoksen oqarpoq.

Naalakkersuisoqatigiinnissamut isumaqatigiissut tunngavigalugu taama saqqummiussaqarpunga, isumaqatigiissummi ima allassimasoqarmat: “Umiarsuarni aqumiussat kalaallit ilinniarsimasut naalakkat aquttullu atorneqartariaqarput, taakku atorluarneqarpata Royal Artic Line A/S-imi inuttarpassuit kalaalinngorsarneqassapput. Aamma kilisaassuarni avataasiutini kalaallit naalakkat aquttullu naammassereersimasut salliutillugit atorneqarnissaat sulissutigineqassaaq, taamaaliornikkut aningaasarpassuit nunanit allamiunit aqumiorineqartunit annissorneqartut nunatsinniilissammata, nunatta aningaasaqarniarneranut iluaqutaallutik.”

Attavigineqarsinnaavoq Aalisarnermut Piniarnermullu Naalakkersuisoqarfimmi pisortaq, Jørgen Isak Olsen. Email: jio@nanoq.gl