Oqarasuaat sianerfissaq matusoq

SNOM320

Sisamanngorneq 19. januar 2017 Nunanut Allanut Pisortaqarfik hotlinemik pilersitsivoq,  tassuuna Polar Nanoq-mi inuttanut qanigisaasut saaffiginnissinnaasut, tassami Polar Nanoq-p Islandimi umiarsualivimmut uteqqereernerata kingorna inuttanut kalaallinut qanigisaasunit saaffiginnissuterpassuit takkussuussimammata.  Nunanut Allanut Pisortaqarfimmit hotlinemik ulloq unnuarlu kalaallisut danskisullu ammasartumik 19. januarimiilli pilersitsereernerup kingorna, inuttanut qanigisaasunit 20-it missaanniittunik saaffiginnittoqartarsimavoq, tamakku apeqqutissaqartarsimasut imaluunniit kissaatigisimagaat Islandimi pisumut paasissutissanik tunniussaqarusullutik.

Ullumikkut nalunaarutigineqarmat Polar Nanoq-mi inuttat tigummigallagaanngitsut Islandimiit aallarsinnaasut, Nunanut Allanut Pisortaqarfimmit nalilerneqarpoq piffissami maannakkuugallartoq hotlinep ammatinnissaa pisariaaruttoq. Taamaasilluni kalaallisut danskisullu hotline ullumikkumiit matuneqarpoq. Namminersorlutik Oqartussani saaffiginnittarfimmi oqarasuaataat +299 34 50 00 aqqutigalugu nalinginnaasumik ammasarfiup iluani Nunanut Allanut Pisortaqarfimmut attaveqarsinnaanissamut suli periarfissaqassaaq. Polar Nanoq tassanilu inuttat pillugit suli saaffiginnissutissaqaraanni Polar Seafoodimut innersuussisoqassaaq oqarasuaatikkut +299 38 31 01. Birna Bránsdóttirip toqutaanerata paasiniarneqarneranut atatillugu politiinut saaffiginnissuteqartoqassappat, Kalaallit Nunaanni politiinut innersuussisoqassaaq, taakku Islandimi politiinut paasiniaaneq pillugu toqqaannartumik attaveqartuummata.

Kalaallit Nunaanni Politiit saaffigineqarsinnaapput ugguuna +299 70 14 48 imaluunniit E-mail: politi@politi. gl atorlugit.

Kalaallit nunani allaniittut tassanngaannaq aallartitaqarnikkut ikiorneqarnissamik pisariaqartitsilersut tamatigut danskit Nunanut allanut ministeriaqarfiani aallartitaqarfiit saaffigineqarsinnaapput imaluunniit Nunanut allanut Ministeriaqarfiup nunarsuaq tamaat pigaartoqartarfia attaveqarfigineqarsinnaavoq ugguuna + 45 33 92 11 12 imaluunniit E-mail: bbb@um.dk atorlugu. Ikiorsiineq danskisut tuluttulluunniit pisinnaavoq.