Annikitsumik aatsitassarsiorluni piiaanissamut soqutiginninneq annertusiartorpoq

Annikitsumik aatsitassarsiornissamut misissuinissamut aamma piiaanissamut nunaqavissut soqutiginninnerat ukiuni kingulliunerusuni annertusiartortoq Aatsitassanut Ikummatissanullu Naalakkersuisoqarfiup maluginiarpaa.

2016-imi Inatsisartut ukiaanerani ataatsimiinnerisa nalaani annikitsumik aatsitassarsiornermut tunngasumik aatsitassanut ikummatissanullu inatsisip iluani allannguinissaq akueraat, tamanna annikitsumik aatsitassarsiornissamut suliaqartuulersussanullu pitsaasumik sinaakkusiivoq.

”Annikitsumik aatsitassarsiornissamut suliassaqarfiup iluani allannguutit suliarineqartut naammagisimaarpakka, nunaqavissummi piiaanissamut pitsaanerusunik atugassaqartinneqalerput. Maannakkorpiaq annikitsumik aatsitassarsiorluni suliassaqarfiup iluani paasissutissanut najoqqutassanik suliaqaleruttorpugut. Suliassaqarfiup iluani innuttaasut ilisimasanik paasinartunik pissarsitinnissaat aammalu pisinnaatitaaffitik pillugit paasisimasaqalersinnissaat pingaaruteqarpoq.”  Aatsitassanut Ikummatissanullu Naalakkersuisoq, Múte B. Egede oqarpoq.

Maannakkorpiaq annikitsumik aatsitassarsiornissamut akuersissutit suliaqarfigineqartut 44-inik amerlassuseqarput qaammatillu pingasut kingulliit iluinnaanni annikitsumik aatsitassarsiornissamut akuersissutit sisamat tunniunneqarlutik. Peqatigisaanik qinnuteqaatit suli allat marluk tiguneqarput, taakkualu suliarineqaleruttorput.

”Aatsitassanik nunatsinni piiaaneq inuiaat kalaallit iluaqutigissagaat naalakkersuisutut qulakkiigassanni pingaarnerpaavoq. Taamaattumillu nunatsinni innuttaasut aamma aatsitassarsiorfinni suliaqarnerup ineriartortinneqarneranut peqataanissamut periarfissaqarnissaat pingaartippara.” Múte B. Egede naggasiivoq.