Inatsisitigut ataataqanngitsut inatsisitigut pisinnaatitaaffii pillugit ataatsimiisitsinissaq

Inatsisitigut ataataqanngitsut inatsisitigut pisinnaatitaaffii pillugit ataatsimiisitsinissamut Naalakkersuisut innuttaasunik aggersaapput

Inatsisitigut ataataqanngitsut inatsisitigut pisinnaatitaaffii pillugit ataatsimiisitsinissamut Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naa­lakkersuisoq, Social- og Indenrigsministereqarfik peqatigalugu innuttaasunik aggersaa­voq.

Inatsisitigut ataataqanngitsunik taaneqartarput inuit katissimanerup avataatigut, Kalaallit Nunaata Kitaani ukioq 1963 sioqqullugu aamma Tunumi ukioq 1974 sioqqullugu inun­ngorsimasut, ataatamillu kinaassusersinissaanik inatsisitigut manna tikillugu periarfissa­qarsimanngitsut. Ataataassuseq kingornussisinnaatitaanerlu pillugit maleruagassat nu­taat ukioq 2014-imi atortuulersinneqarput, taamaalillutillu inatsisitigut ataataqanngitsut ataatamik kinaassusersinissaanik pisinnaatitaaffeqalerput, kingornusseqataasinnaan­ngorlutik (ataataasoq toqukkut qimagussimanngippat) imaluunniit ataatamik kinguliaanik kinguliaqalersinnaanngorlutik.

”Inatsisitigut ataataqanngitsut inatsisitigut pisinnaatitaaffimminnik ilisimatinneqarnissaat Naalakkersuisut pingaartippaat. Inatsisip nutaap atortuulersinneqarnerata kingorna unammilligassaasimasut erseqqissumik suussusersinissaat aammattaaq pingaaruteqar­poq. Taammaammat sammisamik taama pingaaruteqartigisumik oqaluuserisaqarnissaq siunertaralugu ataatsimiisitsinissanut, Social – og Indenrigsministereqarfik peqatigalugu innuttaasunik aggersaasinnaagama nuannaarutigaara. Innuttaasut pisinnaatitaaffitik pil­lugit isumaasa, iliuusissanillu allanik pisariaqartinneqartunik oqariartuutissaasa tusarnis­saat qilanaaraara.”, Isumaginninnermut, Ilaqutariinnermut, Naligiissitaanermut Inatsinillu Atuutsitsinermut Naalakkersuisoq Sara Olsvig oqarpoq.

”Inatsisitigut ataataqanngitsut pillugit suliassaq uannut pingaaruteqarpoq. Nunatsinni in­nuttaasut amerlaqisut pisortanit inatsisitigut eqqunngitsumik pineqarsimanerat aaqqiis­suteqarfigineqartariaqarpoq. Taamaammat suliassaq sammeqqitassanngorlugu qaqeq­qipparput, Folketingillu inatsimmut nutaamut atatillugu isumaliuutissiissutigisimasaata malitseqartinneqarnissaa piffissami aggersumi, Social- og Indenrigsministereqarfik pe­qatigalugu qulakkeerniassavara.”, Sara Olsvig nangilluni oqarpoq.

Innuttaasunik ataatsimiisitsinerit pissapput:

Nuummi, ulloq 24. januar nal. 19.00 – 21.00, Sermersuup Eqqartuussiviani, aamma

Ilulissani, ulloq 2. februar nal. 19.00 – 21.00, Kulturhus Sermermiut 

Ataatassarsiuussinerup qanoq ingerlanneqartarnera, suliassallu suliarineqarnissaata qa­noq ingerlanissaa innuttaasut innuttaasunik ataatsimiisitsinermi paasisaqarfigiumaar­paat.

Isumaginninnermut, Ilaqutariinnermut, Naligiissitaanermut Inatsisinillu Atuutsitsinermut Naa­lakkersuisoqarfiup erseqqissaatigaa innuttaasunik ataatsimiisitsineq, sammisap mianer­nartuunera attuumassuteqartullu eqqarsaatigalugit matoqqasumik ingerlanneqassam­mat. Tusagassiuutit, innuttaasunik ataatsimiisitsinermut uiggiullugu naalakkersuisup Sa­ra Olsvigip oqaaseqartinnissaa siunertaralugu naalakkersuisup allattaanik isumaqatigiis­suteqarnissamut tikilluaqqusaapput. Tusagassiuutit tamatuminnga paasinnilluarnissaat Naalakkersuisut neriuutigaat.

Innuttaasunik ataatsimiisitsinerit paasisitsiniaanermik suliniummut, inatsisitigut ataata­qanngitsuunerup inummut sunik sunniuteqartarneranik qulaajaanertaqartumut ilaapput. Qulaajaaneq Folketingip inatsimmut nutaamut atatillugu isumaliuutissiissummini kaam­mattuutigisaa maanna ingerlanneqarpoq, aasamullu tamanut saqqummiunneqarsinnaa­nissaa naatsorsuutigineqarpoq. 

Inatsisitigut ataataqanngitsut pillugit paasissutissaasinnaasut Naalakkersuisut internetik­kut nittartagaanni takuneqarsinnaapput.

Annertunerusumik paasisaqarumalluni
Saaffissaq: Naalakkersuisup allattaa Nina Jul Larsen e-mail: nina@nanoq.gl,  oqarasuaat: 53 93 71