Qujanaq-mut karsi akeqanngitsoq eqqakkanik immikkoortiterinissamut pisariinnerulersitsivoq

Qujanaq-mut karsimik, batteriinut qullernullu peerinut atorunnaakkannut puussamik akeqanngitsumik kommunimut aallersinnaavutit

Batteriit qulliillu atorunnaakkat katersornissaannut ikiuunnissat pisariaqartipparput. Taamaattumik peerinut batteriinullu atorunnaakkannut ”Qujanaq-mut karsimik” akeqanngitsumik kommunimut aallersinnaavutit. Karsi immikkoortiterivik atorlugu batteriinik qullernullu peerinik immikkoortiterinissaq, taamaalillunilu eqqakkanut nalinginnaasunut ilanngullugit eqqaasannginnissaq pisariinnerulissaaq. Karsi ulikkaarpat najukkami tigooraavimmi imaluunniit najukkami pisiniarfinni puussanut inissinneqarsimasunut imaarneqarsinnaavoq,

Tamatta eqqakkatsinnik immikkoortiterinissamut ikioqatigiinnissarput pisariaqartorujussuuvoq. Maanna kommunit peqatigalugit paasititsiniaanermik, kommunit peqatigalugit tamatta immikkut batteriinut qullernullu peerinut atoriikkatsinnut qanoq iliorsinnaanerluta ingerlatsilerpugut. Eqqakkat immikkoortiternissaat pisariitsuussaaq ajornaatsuussallunilu”, Namminiilivinnermut, Pinngortitamut, Avatangiisinut Nunalerinermullu Naalakkersuisoq Suka K. Frederiksen oqarpoq. 

Qulliit peerii batteriillu ulluinnarni eqqakkanut, eqqaavinnut iginneqartartunut akuleruteqqusaanngillat. Ikuallaavinni ikuallanneqaraangamik mingutsitsisarput akuutissanillu toqunartunik aniatitsisarlutik. Batteriit qulliillu peerii eqqortumik tunniunneqaraangamik, Danmarkimi Reno Nord-imi suliassanngorlugit umiarsuarmik nassiunneqartarput, taamaalillunilu batteriit qulliillu peeriini saffiugassat oqimaatsut toqunartullu allat pinngortitami mingutsitsinnginnissaat qulakkeerneqartarpoq.

Attaveqarfissanut paasissutissat: Naalakkersuisup allattaa Naasunnguaq Olsen, oqarasuaat 52 36 84 imaluunniit e-mailikut: nasu@nanoq.gl