Aatsitassanut Ikummatissanullu Naalakkersuisoqarfik Aqutsisoqarfillu unnuk kulturisiorfimmi peqataassapput

Aatsitassanut Ikummatissanullu Naalakkersuisoqarfik aamma Aatsitassanut Ikummatissanullu Aqutsisoqarfik sulerisarnersut arfininngorpat nal. 16.00- 19.00-illu akornanni aggerlutit paasiniaruk.  Nunarsuarmi ujaqqat pisoqaanersaasa ilai takukkit, siusinnerusukkut Ujarassiorimmi misissugassat ajugaassutaasimasut takukkit, aammalu Kalaallit Nunaanni ujaqqat asseqanngilluinnarnerpaat ilai ujaqqanillu nalilinnik piffiit pillugit ujarassiuunik oqaloqateqarit. Annikitsumik aatsitassarsiornissamut akuersissummik qanoq iliorluni qinnuteqartoqarsinnaanersoq paasiniaruk. Aamma meeqqanoortoqartussaammat ilaginiarigit.

 

Kalaallit Nunaanni nunap iluani ujarannguunnikut aggerlutit takusakkit

Kalaallit Nunaanni nunap iluani ujarannguunnikut Danmarkimi Ujarassiornermut katersugaasivimmit (Statens Naturhistoriske Museum) immikkut atukkiunneqartut aggerlutit takukkit. Nunap iluaneersut sooq taama alutornartiginersut, qanoq asimi suliaqarnermi taakkua katersorneqartarnersut aammalu sumut atorneqarsinnaanersut itsarsuarnisarsiuutta ilaannit tusagaqarfigiuk. 

 

Aatsitassat taartumi ikumasartut

Inimut taartumut iserlutit aatsitassat taartumi qinngorneqarlutik qaammartartut kusanarluinnartut takusarnissaat merserinngiliuk? Sooq qaammartarpat aammalu Kalaallit Nunaanni sumi nassaarineqarsinnaappat? Aatsitassat pissanganartut taakkua pillugit aggerlutit aatsitassalerisutta ilaannit annertunerusumik tusagaqarit.

 

Ujaqqanik pinnersaasiat assigiinngitsut alakkakkit

Ujaqqanik pinnersaasiat kusanartut, silinikut aamma qanoq naleqartigisinnaanersut takusakkit. Aamma takuuk Kalaallit Nunaata sortaani pinnersaasiassat ujarneqarsinnaanersut ilikkakkit.

 

Aatsitassarsiorneq pillugu iluamik paasisaqarnerorusukkuit aggerlutit tusarnaariarit

Open-Pit aamma underground mining suunersut nalunngiligit? Aatsitassarsiorneq qanoq aallartinneqartarpa aamma suna aatsitassarsiorfiup angissusissaanut aaliangiisuusarpa? 

 

Meeqqanut aatsitassanik eqqoriaasitsineq

Aatsitassanik eqqoriaallaqqippit, imaluunniit aatsitassat isiginnaarlugit aammalu pinngortitami nammineerlutit ujarlugit nuannariinnarpiuk – taava alakkarit. Meeqqanut peqataasunut tamaginnut akissarsiassartaqartumik meeqqanut aatsitassanik eqqoriaasitsisoqassaaq.

Aatsitassanut Ikummatissanullu naalakkersuisoq naapinneqarsinnaajumaarpoq.