Innarluutilinnut tunngassuteqartut nukittorsarneqassapput

Innarluutilinnut tunngassuteqartut nukittorsarneqassapput - IPIS Nuna Tamakkerlugu Innar-luutilinnik Sullissivimmut kattunneqassaaq

1. januar 2017-imiit IPIS Sisimiunut nuunneqarpoq Nuna Tamakkerlugu Innarluutilinnik Sullissivimmut Sisimiuni pilersinneqalersumut kattunneqassalluni.

IPIS ininik attartorallarpoq adresseqarallarlunilu. Taamaattoq IPIS oqarasuaatikkut qarasaasiakkullu maannakkutut attaveqarfigineqarsinnaavoq.

Naalakkersuisut innuttaasunut innarluutilinnut isumaginninnermi sullissinermilu pissutsit pitsaanerulersinniarpaat aamma Nuna Tamakkerlugu Innarluutilinnik Sullissivik atorlugu innuttaasunik ataasiakkaanik siunnersuisarnermut, ilitsersuisarnermut sungiusaasarnermullu periarfissat assigiinngitsut amerlanerusut neqeroorutaasalissapput. Innuttaasunut innarluutilinnut tamanut, meeqqanut inersimasunullu taamatullu ilaqutaasunut taamatullu innarluutilinnut tunngassuteqartunik ilinniarsimasunut qitiusumik sallersaalluni sullissiviussaaq. Sullissivimmi najukkanilu innuttaasut ataasiakkaat najugaqarfigisaanni pisariaqartitsiviusunilu sullissiviup suliarisartagai neqeroorutigineqartassapput.

Sullissivik innarluutilinnut tunngassuteqartut ataatsimut isigalugit pitsanngoriaataassaaq. Siunnersuisarneq, ilitsersuisarneq sungiusaasarnerlu ataatsimoortinneqalissapput, tassami IPIS-imi suliarineqartartut siunissamut sullissivimmi suliarineqartalissammata.

Naalakkersuisoq Sara Olsvig ilanngussivoq: ”Nuna Tamakkerlugu Innarluutilinnik Sullissivik eqqarsaatigilluagaavoq assersuutissaqqilluinnarlunilu peqatigiilluta akornutaasunik uatsinnik unittooqqajaasitsisunik ajugaaffiginnissinnaanitsinnut. Peqatigiilluta akisussaassuseqassaagut peqatigiillutalu sulissutigissavarput inuit innarluutillit sapinngisamik nalinginnaasumik inuuneqalernissaat qulakkeerniassallugu.”

IPIS-imiit innarluutilinnik sullissiviup ammarnissaanut ikaarsaariarnermi tassani IPIS-ip siunnersuisarnermik ilitsersuisarnermillu suliarisartagai innuttaasunut innarluutilinnut, ilaqutaasunut taamatullu tamakkuninnga sulialinnut tunngatillugu ingerlaannassapput.

Aatsaat innarluutilinnik sullissivik ammarpat IPIS maannakkutut iluseqarnerminit atorunnaarsinneqassaaq.

Innarluutilinnik sullissivik naatsorsuutigineqarpoq august - september 2017-imi ammassasoq.

Annertunerusunik paasissutissarserusukkuit attaveqarfigissavat: Immikkoortortaqarfiup pisortaa Kirsten Olesen, kiol@nanoq.gl imaluunniit mobil 55 32 52

Piviusut
Nuna tamakkerlugu innarluutilinnik sullissivissaq Qarsoq Tegnestuemit titartarneqarpoq, Permagreen Grønland A/S-ilu pingaarnertut sanaartortuulluni. Sullissivissaq Sisimiuni Gertruds Rask Mindep eqqartuussivittaassallu akornanni sanaartorneqartussaavoq.