Naalakkersuisoq Suka K. Frederiksen erseqqissaavoq: Poortuutissanut maleruagassat allanngortinneqassanersut Naalakkersuisunit aalajangiiffigineqanngilaq

Maanna Naalakkersuisuusut puiaasanik utertitsisarneq pioreersoq ingerlaannassanersoq, naleqqussarneqassanersoq imaluunniit utertitseriaatsimik nutaarluinnarmik atuutsitsisoqalissanersoq pillugu suli aalajangiinngillat

Erseqqissaatigissavara, Naalakkersuisut maannarpiaq poortuutissanut maleruagassanik allannguiniarlutik suliaqanngimmata. Suliassaqarfimmi paasissutissanik pissarsiniarluta misissuiniarlutalu sulivugut. Aatsaat ilisimasat nutaanerpaat pissarsiarereerutsigit allannguisoqassanersoq Naalakkersuisut naliliiffigissavaat. Tassalu maannarpiaq KNR-ip nutaarsiassaqarfiatigut kukkusumik saqqummiunneqartutut nalunaarutip allanngortinneqarnissaanik suliaqanngilagut.”, Namminiilivinnermut, Pinngortitamut, Avatangiisinut Nunalerinermullu Naalakkersuisoq Suka K. Frederiksen erseqqissaavoq.

Avatangiisit eqqarsaatigalugit utertitseriaaseq maanna atorneqartoq Kalaallit Nunaata kitaani ingerlalluartorujussuuvoq, utertinneqartartut 98 %-it sinnerlugit amerlassuseqartarlutik. Puiaasanik utertitsisarneq Kalaallit Nunaata avannaani Tunumilu atorneqanngilaq, taamaattumillu sumiiffinni taakkunani puukorpassuit pinngortitamut qimaannarneqartarput eqqaavissuarnulluunniit eqqarneqartarlutik, taamaalillutillu avatangiisinut ajoqusiisarlutik. 

”Sulinitsinni tamatigut peqqissaartumik sulinissarput, aammalu Naalakkersuisut nunatsinnut pingaarutilinnik aalajangiisussanngortillugit ilisimasanik nutaanerpaanik peqarnissarput pingaaruteqarpoq. Taamaattumik poortuutissanik suliassaqarfimmi misissuinissarput, taamaalillutalu utertitseriaatsip maanna atorneqartup qanoq ingerlaneranik, kiisalu utertitseriaatsimik naleqqussakkamik nutaamilluunniit atuutsitsilernissamut periarfissat suunerinik paasisaqarnissarput pisariaqarluinnarpoq. Misissuineq aallartilluareerpoq, misissuinerullu marsimi naammassinissaa naatsorsuutigaara. Aatsaat misissuinerup inerneri Naalakkersuisunit ilisimaneqalerpata, poortuutissanut suliassaqarfimmi allannguinissaq naleqqunnersoq Naalakkersuisut isummerfigiumaarpaat”, Namminiilivinnermut, Pinngortitamut, Avatangiisinut Nunalerinermullu Naalakkersuisoq Suka K. Frederiksen nassuiaavoq.

”Soorunami Grønlandskonsortiet-ip Nuuk Imeq-p 2018-ip naanerani matuneqarnissaanik innersuussuteqarnera eqqumaffigaara, aamma soorunami suliap taassuma ineriartornera qanoq ingerlanersoq malinnaaffigaara, kisiannili Nuuk Imeq A/S aktianik piginneqatigiiffittut namminersortutut atortunut aningaasaliissanerluni aammalu suliaminik ingerlatseqqissanerluni nammineerluni aalajangiisussaavoq”, Naalakkersuisoq Suka K. Frederiksen nangippoq. 

Avatangiisinut Naalakkersuisoqarfiup ilisimatitsissutigisinnaavaa, poortuutissanik suliassaqarfimmi misissuinernut ingerlanneqartunut ilaatigut Nuuk Imeq suleqataammat.

Annertunerusumik paasisaqarusunnermi naalakkersuisumut allatsi Naasunnguaq Olsen, +299 34 54 14-mut, e-mail: nasu@nanoq.gl attaveqarfigineqassaaq.