Poortuutissat pillugit Nalunaarummut tunngasumut naqqiut

KNR-ip nittartagaani saqqummiivoq utertitsinermi qularnaveeqqusiut pillugu inatsisitigut Nalunaarut suliarineqaleruttortoq, kisianni tamanna eqqunngilaq.

Namminiilivinnermut, Pinngortitamut, Avatangiisinut Nunalerinermullu Naalakkersuisoq Suka K. Frederiksen oqarpoq: 

”Matumuuna naqqiissutigineqassaaq, uanga Naalakkersuisutut nalunaarutiginnginnakku inatsisitigut Nalunaarut  suliarineqaleruttortoq. Soorlu siusinnerusukkut tusagassiuutitigut nalunaarutigineqartutut ersertoq Naalakkersuisut maanna suliaqartut periarfissat qulaajarlugit utertitsinermi qularnaveeqquseeriatsimik tulluarsakkamik nutaajusumilluunniit atuutsitsilernissamik. Misissuineq tungavigalugu, marts-imi 2017-imi naammassinissaanik naatsorsuutigineqartumi, Naalakkersuisut naliliiumapput maannamut utertitsinermi qularnaveeqquseeriaatsimi ingerlatseriaaseq ingerlaannassanersoq, naleqqussaasoqassanersoq imaluunniit nutaarluinnarmik atuutsitsilertoqassanersoq. Ingerlatseriaatsimi allannguisoqassappat, tamanna pitinneqarsinnaavoq poortuutissat pillugit Inatsisitigut Nalunaarummi allannguisoqarnera aqqutigalugu.”

Sukumiinerusumik paasisaqarusuttut attaveqarfigisinnaavaat Naalakkersuisup allattaa Naasunnguaq Olsen, taanna attaveqarfigisineqarsinnaavoq oqarasuaatikkut 34 66 22 sianerfigalugu imaluunniit e-mailikut: nasu@nanoq.gl