Isumaginninnermut Aqutsisoqarfimmi pisortaq nutaaq

Hans-Peder Barlach Christensen februaarip aallaqqaataani Isumaginninnermut Aqutsisoqarfimmi pisortatut sulilissaaq.

Aningaasaqarnermut inatsit 2017-imoortup akuersissutigineqarneranut atatillugu isumaginninnermut suliassaqarfimmi aningaasaliissutit arlariit illikartinneqarput, tamatumani Isumaginninnermut Aqutsisoqarfimmik pilersitsinissamut aningaasaliissutit.

Ullumernit kommuuninik qitiusumit pitsaaneroqisumik ikorfartuinissat siunertaralugit Isumaginninnermut Aqutsisoqarfik pilersinneqassaaq. Iliuusissani arlariinni suleriaatsit assigiissarneqarnerusut aammalu ilinniartitseqqittarnerit ilusilersorneqassapput, misilittagarilluarineqartunik avitseqatigiinnerit aaqqissuunneqassapput, qaraasiakkut periutsit inatsisinik toqqammaviliisut aqqutissiuunneqassapput, iliuusissanik periusissianik tamakkerlugu isiginnilluarsinnaaneruneq siunnerfigineqassaaq kiisalu pingaarnertut ilisimasalinnit qitiusunit ataavartumik ikiorneqarneq ikorfartorneqarnerlu aqqutigalugit siunnerfiit anguneqassapput.

”Isumaginninnermut Aqutsisoqarfiup kommuuninik qanoq ikiuillunilu ikorfartuinissaa pillugu aallussisoqassammat, nuannaarutigaara Hans-Peder Barlach Christensen sulilersinnaqassammat, kommuuninut suliassani pineqartuni piffissami sivisuumi sulianik ingerlatsilluni suliassaqarfinnillu aallussisimammat” Sara Olsvig, Isumaginninnermut, Ilaqutariinnut, Naligiisitaanermut Inatsisinillu atortitsinermut Naalakkersuisoq oqarpoq.

Paasissutissanik sukumiinerusunik paasisaqarusukkuit attavigisinnaavat pisortap tullersortaa Lene Rohmann Hansen attavigineqarsinnaallunilu e-mail lrh@nanoq.gl atorlugu.