Akuulersitseqqinniarneq annertuumik taperserneqartoq

Stemningsbillede af Indlandsisen

Kalaallit Nunaanni pinerluttarneq aamma naapertuilluartuliorfigisaanermik misigineq pillugu nalunaarusiaq Naalakkersuisut nittartakkakkut qupperneranni tamanut saqqummiunneqaqqammerpoq. Eqqartuusinerit pingaarnertut pinerluuteqartup pinerluffiunngitsumik inuuneqalernissaanik tapersiinertut ikiorsiinertullu siunertaqassasut, innuttaasut 77 procentii isumaqartut misissuinerup takutippaa.

Isumaginninnermut, Ilaqutariinnut, Naligiissitaanermut Inatsisinillu atortitsinermut Naalakkersuisoq Sara Olsvig ima oqarpoq: ”Kalaallit innuttaasut inuit pinerluuteqartut qanoq eqqartuussivimmi pineqartarnissaannik isumaqarnerat naapertuilluarnermik misissuinerup erseqqissumik takutippaa. Pissutsit ullumikkutut inneranni, innuttaasut pinerluffiunngitsumik inuuneqalernissamik immikkut piumasaqaataat naammassineqanngitsoq isumaqarpunga. Tamanna ajuusaarnartorujussuuvoq, iliuuseqarfigisariaqarparpullu.”

Nunanut avannarlernut allanut sanilliulluta inuit 100.000-iugaangata inuit pineqaatissinneqartunut inissiivinniitinneqartut amerlassusaat qaffasissorujussuusoq, nalunaarusiami ilanngullugu inerniliunneqarpoq. Nunarsuarmut tamanut sanilliussinermi Kalaallit Nunaat nunanit 202-nit nr. 31-itut inissippoq. Peqatigisaanillu pinerluuteqarsimasunut inissiisarfiit ammasut maanna pigineqartut ungerutissianik kapinartulinnik igalaanillu qajannaatsunik pilersugaanermikkut, inissinneqartullu taamaallaat killilimmik pinerluuteqartunut inissiisarfiup avataani sulitinneqarneranni matoqqasutut parnaarusivittut ittut nalunaarusiaq inerniliivoq.

”Pinerluttulerinermik inatsisip anersaava akimorlugu pinerluuteqarsimasunut inissiisarfiit matoqqasunngoriartorsimanerat annertuumik ajornartorsiutaasutut isigaara. Tamanna aaqqiivigisariaqarparput. Uanga paasinninnera naapertorlugu pinerluuteqarsimasunut inissiisarfiit annertunerujussuarmik eqqummaariffigisariaqarpavut. Tamanna aamma pinerluuteqarsimasunut inissiisarfinni sulisut ilinniartinneqarnerannut, inissinneqartullu katsorsarneqarnermik suliffeqartinneqarnissamullu periarfissaannut aamma tunngavoq. Inuiaqatigiinnut akuulersitseqqinniarnermik suliniarnerup ingerlalluartilernissaa pingaaruteqarpoq, taamaalilluta inissinneqartut pinerlunniarnertaqanngitsumik inuuneqalersinnaanerannut periarfississavavut,”, Sara Olsvig oqarpoq.

Nalunaarusiaq Københavnip Universitetiani kriminologimut professorimit Flemming Balvigimit suliarineqartoq uani atuarneqarsinnaavoq

Attaveqarfissaq paasissutissanik erseqqinnerusunik pissarsiumalluni, Naalakkersuisoqarfiup pisortaa Julie Præst Wilche attaveqarfigineqarsinnaavoq e-mail: jprw@nanoq.gl Oqarasuaat: 55 11 90