Nuup Imeq-p matunissaanik ilimasaarut pillugu

Selvstyrebygningen i Nuuk Nuuk Imeq A/S 9. januar 2017-imi Nuuk Imeq-p 2018-ip naanerani matuneqarnissaanik Grønlandskontortiet-ip inassuteqaataa pillugu tusagassiorfinnut nalunaaruteqarpoq. Nuuk Imeq-p puiaasanik utertitsisarneq pioreersoq, taamaallaat Kalaallit Nunaata kitaani ingerlanneqartoq isumagisaraa. Naalakkersuisunit Nuuk Imeq-p nalunaarutaa tusaatissatut tiguneqarpoq. Namminersorlutik Oqartussat aktianik piginneqatigiiffimmut Nuuk Imeq A/S-imut piginneqataajunnaarput. Nuuk Imeq A/S aktianik piginneqatigiiffittut namminersortutut maskiinanut aningaasaliisoqassanersoq aammalu suliffeqarfik ingerlaannassanersoq pillugu nammineerluni aalajangiisussaavoq.

Maannarpiaq Naalakkersuisut puiaasanik utertitseriaatsimik naleqqussakkamik imaluunniit nutaamik atuutsitsilernissamut periarfissanik misissuipput. Misissuinerit tunngavigalugit puiaasanik utertitseriaaseq atuuttoq ingerlaannassanersoq, naleqqussarneqassanersoq imaluunniit utertitseriaatsimik nutaarluinnarmik, atuuffiusumik annertusititsiviusinnaasumik atuutsitsisoqalissanersoq Naalakkersuisut isummerfigissavaat. Utertitseriaatsimi allannguisoqassappat, tamanna ilaatigut poortuutissanut nalunaarutip allanngortinneratigut pissaaq.

Poortuutissanut nalunaarummi 2002-meersumi Nuuk Imeq-mit puiaasat Kalaallit Nunaata kitaani salliutinneqarput. Avatangiisit eqqarsaatigalugit Nuuk Imeq-p puiaasanik utertitseriaasia Kalaallit Nunaata kitaani ingerlalluarpoq: Ataatsimut isigalugu Kalaallit Nunaata kitaani utertinneqartartut 98 %-it sinnerlugit amerlassuseqarput. Taamaalilluni immiaaqqat sodavandillu puukui Nuuk Imeq-meersut tamangajammik utertinneqartarput maqitsivimmilu atoqqinneqarsinnaasarlutik. Kalaallit Nunaata kitaani utertitsisarneq procentinngorlugu taama qaffasitsigimmat, tamanna avatangiisinut pitsaasuuvoq. Taamaalilluni puiaasat utertitat aqqusinernut pinngortitamulluunniit eqqarneqaannartanngillat, kisiannili atoqqinneqaqattaarsinnaasarlutik. Puiaasanik utertitsisarneq Kalaallit Nunaata avannaanut Tunumullu siaruartinneqarsimanngilaq, taamaattumillu sumiiffinni taakkunani avatangiisinut naleqquttumik aaqqiissuteqartoqartoqarnissaa amigaatigineqarpoq.

Annertunerusunik paasissutissarserusuttut attaveqarfigisinnaavaat: Namminiilivinnermut, Pinngortitamut, Avatangiisinut Nunalerinermullu Naalakkersuisoqarfik. E-mail: npann@nanoq.gl