Kangilinnguit atuinnarneqarniarnera tusaatissatut tiguaat

Sakkutooqarfiup Kangilinnguit atuinnarniaraa pillugu paasissutissiineq Naalakkersuisut tusaatissatut tiguaat.

”Naalakkersuisut Kangilinnguani Sakkutooqarfiup pilerseqqinneqarnissaa itigartissagaat, Inatsisartunut ilaasortap Ineqi Kielsen-ip, Siumumeersup Naalakkersuisunut allakkani ammasuni kaammattuutigaa.

1951-imi Sakkutooqarfiup Kangilinnguit akisussaaffigilerlugu tiguaa. Taamaattumik sumiiffik Sakkutooqarfiup sivisuumik atorsimavaa, aammalu maannakkut Sakkutooqarfik aalajangerpoq sumiiffik qimallugu nuunniarunnaarluni. Aalajangerneq taanna Naalakkersuisut tusaatissatut tiguaat, tamannalu qulequtaq taanna pillugu Ineqi Kielsen-imut § 37 naapertorlugu apeqquteqaammut akissuteqaatinni nassuiarpara.

Sakkutooqarfik Kangilinnguit qimallugu nuunnissaat pillugu  politikkikkut isumaqatigiissuteqartoqanngilaq, taamaattumillu aamma Sakkutooqarfiup Kangilinnguit qimallugu nuunniarunnaarnera pillugu politikkikkut isumaqatigiissuteqartoqartussaannani. Sakkutooqarfiup Kangilinnguit qimallugu nuunniarunnaarneranut akerliunissamut, Naalakkersuisut paasissutissiissutigineqartut tunngavigalugit pilersaaruteqanngillat, taamaattorli mingutitsinermi saliinissap ingerlanneqarnissaanik Naalakkersuisut aalajangiussimallutik.

Suliami pineqartumi Namminersorlutik Oqartussat akuutinneqarneranni ilisimatinneqarnerannilu periaasiusut Naalakkersuisut naammagisimanngilaat. Tamanna soorunami malersoqqissavarput. Taamatullu isumaqarpunga sumiiffimmi avatangiisini qanoq saliisoqarnissaata ingerlanneqarnissaa pillugu suli isumaqatigiittoqarsimanngimmat, tamanna naammaginanngitsoq. Kangilinnguit qimanniarnagu Sakkutooqarfimmit aalajangiinneq qanoq suliaqarnermi kinguneqassanersoq pillugu paasissutissat erseqqinnerusut suli utaqqivakka. Kiisalu erseqqissaqqissavara Kangilinnguani avatangiisini saliinissaq Illersornissamut ministereqarfiup isumagissaagaa akisussaaffigigaalu Naalakkersuisut pingaartimmassuk. Sukumiisumik saliisoqassaaq, illersornissamut ministereqarfiup Kangilinnguit qimallugu nuunniarunnaarnera apeqqutaatinnagu” oqarpoq Naalakkersuisoq Suka K. Frederiksen.

 

Paasisaqarnerorusuttut attavigisinnaavaat Naalakkersuisumut allatsi Naasunnguaq Olsen, oqarasuaat angallattagaq +299 52 36 14 imaluunniit e-mail nasu@nanoq.gl.