Misilittakkanik avitseqatigiinnissaq siunissamilu unammilligassaasinnaasut pillugit isumasioqatigiissitsineq

Saammaateqatigiinnissamut Isumalioqatigiisitaq aammalu Isumaginninnermut Ilinniarfik suleqatigiillutik ulluni 1.- 2. april 2017-imi Ilulissani isumasioqatigiissitsiniarput. Isumasioqatigiinneq Isumaginninnermut Ilinniarfimmi ingerlanneqassaaq. 

Isumasioqatigiinneq taamatut aaqqissuussat siullersarissavaat, tamatumanilu nunanit allaneersut nunatsinnilu immikkut soqutigisaqartut, ilisimatuut, ilinniagaqartut, eqqumiitsuliortut, utoqqaanerusut inuusuttullu ataatsimoorlutik ilisimasaminnik misilittakkaminnillu avitseqatigiissapput. Isumasioqatigiinneq assigiinngitsutigut ilisimasallit akornanni isummanik saqqummiussiffigineqartussaavoq, tamatumani inuiaqatigiinnut tunngassutillit tulluartut taamatullu nunap inoqqaavisa pisinnaatitaaffiinut, inooqataanermi eqqaamasat, nunasiaataanermi pissutsit, oqaluttuarisaaneq, ilinniagaqarneq, kinaassuseq, oqaatsit inuiaqatigiinnut kulturikkullu kingornussat il.il. sammineqassallutik. 

”Isumasioqatigiinnermi siunertarineqarpoq ilaatigut misilittakkat ilisimasallu toqqammavigalugit oqaloqatigiinnissaq aammalu siunissaq isigalugu unammilligassat aaqqiissutaasinnaasullu eqqartuiffiginissaat. Isumasioqatigiinnissaq aallaaveqarpoq Saammaateqatigiinnissamut Isumalioqatigiissitap anguniagaanik, ilisimasanik annertusaanissaq aammalu tamakku pillugit innuttaasut akornanni oqallittoqalernissaa. Tamatumani Isumaginninnermut Ilinniarfik qanimut suleqatigalugu nunatta avataani nunatsinnilu misilittakkat oqaloqatigiinnikkut ingerlateqqinneqarnissaannut tapersiissaagut”, taama oqaaseqarpoq Saammaateqatigiinnissamut Isumalioqatigiissitami siulittaasoq Josef Therkildsen, nangillunilu:

”Immikkut ilisimasallit, soqutigisaqaqatigiiffiit, ilinniartut, innuttaasut soqutiginnittut minnerunngitsumillu eqqumiitsuliortut saqqummersitsinikkut taperseerusuttut peqataanissaminnut qaaqquneqarnikuupput. Isumasioqatigiinneq soqutiginnittunut tamanut ammasuuvoq, taamaattumillu neriuutigaarput inuusuttut utoqqaanerusullu amerlanerusut peqataanissaminnut soqutiginnikkumaartut. Ilaatigut oqalliffimmi periarfissaqarumaarpoq ulluinnarni misilittakkanik avitseqateqarnissaq”, taama naggasiivoq Josef Therkildsen. 

Takujuk http://www.saammaatta/

Peqataanissamut nalunaarnissami annertunerusumillu paasisaqarnissamut saaffigineqarsinnaavoq allattoqarfimmi pisortaq Steen Jeppson, oqarasuaat. +299 34 51 36 imal. email: sjps@nanoq.gl.