Saarullittassat amerlassusilerneqarput

Saarulliit ukioq maannamut 36.500 tonsit pisassiissutaapput

Naalakkersuisut ullumi januaarip tallimaanni 2017-imi aalajangerput sinerissap qanittuani  ukioq manna saarullittassiissutit 36.500 tonsiussasut.

Saarulliit 35.000 tonsit inuussutissarsiutigalugu aalisartunut pisassiissutigineqarput, 1.500 tonsit sunngiffimmi aalisartunut pisassiissutigineqarlutik. 

Erseqqissaassutigineqarpoq tunisassiorfiit killilimmik tunitsivigineqartarnerisa nalaanni inuussutissarsiutigalugu aalisartut tunisinissaannut salliutinneqartassasut.

Sumiiffiit ilaat saarulliit suffinerisa nalaanni aalisarfigineqassanngillat. 

Aalisarnermut Piniarnermullu Naalakkersuisoqarfik, Pinngortitaleriffik  aamma aalisarnermik tunngasunik kattuffiit suleqatigiillutik saarulliit suffinerisa nalaanni sumiiffiit aalisarfigeqqusaanngitsut ilisimatitsissutigissavaat.

Naalakkersuisut ilanngullugu aalajangerpaat nunatsinni qaleralinnik tunitsiviit tamarmik pinngitsooratik saarullinnik aalisakkanillu allanik aamma tunitsiviusassasut, aalisakkanik eqqaasoqartarani. 

Kitaata sineriaata qanittuani saarullinniartut naatsorsuutigisamit amerlanerupput, 2016-imut saarullittassiissutigineqartut marloriarlugit ilaneqartarsimallutik.

Sinerissap qanittuani 2016-imut pisassiissutit 34.400 tonsiupput. 

2016-imi qaleralinniarnerit saattuarniarnerillu arlaleriarlutik unitsinneqartarsimapput, taamaalilluni naatsorsuutigisamit sinerissap qanittuani saarullinniartut amerlanerusimallutik.

Biologit saarullittassatut innersuussutaat 12.379 tonsiupput. 

- Iluarisimaarpara  Naalakkersuisut ukioq manna saarullittassiissutinut piumassuseqarlutik aalajangeeqataammata. Taamaalilluni saarullittassiissutigineqartut  tunngavigalugit  kipisaqattaanngitsumik aalisartoqarsinnaalissaaq.

Attavigineqarsinnaavoq Aalisarnermut Piniarnermullu Naalakkersuisoqarfimmi immikkoortortami pisortaq, Emanuel Rosing. Email: emanuel@nanoq.gl