Ukiortaami Ilassinninnermi ornigarneqarluartumi nuannaartut

Innuttaasut 400-nit amerlanerusut Naalakkersuisut Katuami ukiortaami ilassinninnerannut ulloq 3. januaari 2017-imi ingerlanneqartumut ornigupput. Innuttaasut Naalakkersuisunut ilaasortat ilassinissaannut periarfissinneqarput kaagimik illulerlugu kaffisorusaajutigalutik.

Innuttaasut Naalakkersuisullu nuannaarlutik imminnut ilassiorput.

Naalakkersuisut Siulittaasuat Kim Kielsen tikilluaqqusilluni oqalugiarami ilaatigut ima oqarpoq:

”Nukiillumi eqiterneqarnissaat pisariaqartipparput nunatta imminut napatissinnaalernissaanut siuariartortitsinissamut ineriartortitsinissamullu ataavartunik iliuuseqarsinnaaqqulluta. Nunatta sanarfinissaanut kikkuusugut tamatta pisariaqartinneqarpugut qanorluunniit tunuliaqutaqaraluarutta oqaaseqaraluaruttaluunniit

Ataatsimoorneq kikkunnillu tamanik peqataatitsineq akunnitsinni nukissatsinnik immersuisorissavarput. Tamatta inuiaqatigiinni akisussaaqataalluta suleqataallutalu akuutinneqarnissarput – nammineerlutalu akuliusimanissarput pissusissamisoortutut isigissavarput.”

Naalakkersuisut siullermeertumik aalajangerput ukiortaami ilassinninnermi ukioq manna innuttaasunut kaffillertoqassasoq, tassanilu erinarsoqatigiit NIPE juullisiutinik tussiaqattaarlutik aliikkusersuipput Klovnen Miki meeqqanut angakkuaqattaarluni imermik qaqorsaatilinnik pullartalioqattaarpoq meeqqallu assiliseqatigisarlugit.

Tikilluaqquilluni oqalugiaat tamaat atuaruk.

Naalakkersuisut ilassinninnerannit assit takukkit.

Paasisaqarnerorusuttut attavigisinnaavaat Tusagassiivimmi pisortaq Paornánguaq Kleist, oqarasuaat +299 34 50 00, oqarasuaat angallattagaq +299 55 94 24 imaluunniit e-mail paok@nanoq.gl.