Saammaateqatigiinnissat ingerlaasii pillugit atuartitsissutissat

“Saammaateqatigiinnissat ingerlaasii” pillugit atuartitsissutissatut pilersaarutit saqqummerput

Saammaateqatigiinnissamut Isumalioqatigiissitaq sulinermini suliniutinik arlariinnik aallartitsinikuuvoq. Suliniutit ilagaat “Saammaateqatigiinnissat ingerlaasii” pillugit atuartitsissutissatut pilersaarutinik suliaqarneq, GUX-imi ilinniartunut tulluarsagaasut. Saammaateqatigiinnissamut Isumalioqatigiissitap nuannaarutigaa atuartitsissutissatut pilersaarutit atortussai ilanngullugit tamanut saqqummiunneqarmata, fagini kalaallisut, qallunaatut, tuluttut, kulturilerineq, inuiaqatigiilerneq aammalu oqaluttuarisaaneq. Fagit akimorlugit atuartitsinermi aamma atorneqarsinnaapput.

“Ajunngilluinnarpoq, qulequttanik sammisaqaraangatta assersuutigalugu nunanut allanut tunngasunik, maanna atassutilerneqarsinnaalermata Kalaallit Nunaanni pisunut ingerlaatsinullu imaluunniit Kalaallit Nunaata oqaluttuarisaaneranut attuumassuteqartunut. Nuannaarutigaara maanna kalaallit saammaateqatigiinnissamut isumalioqatigiissitaata suliaanik ilanngussisinnaaleratta, nunani allani saammaateqatigiinnissamut tunngasunik sammisaqalernerni assersuutigalugu Australiami imaluunniit Canadami. Taamaasilluni tuluttoornermi qulequttat ilinniartuutitsinnut tulluarnerulissapput aammalu piviusunut qaninnerulissallutik”. Taama oqaaseqarpoq Louise Kyhl, Sisimiuni GUX-imi tuluttut atuartitsisartoq.

Ima aamma oqaaseqarpoq Saammaateqatigiinnissamut Isumalioqatigiissitami siulittaasup tullia, Dorthe Katrine Olsen.

“Uagutsinnut pingaaruteqarsimavoq, isumalioqatigiissitami sulinitsinni ilinniarfeqarfiit ilanngunnissaat. Taamaasilluta kinguaariit inuusunnerusut nunatta iluani nunarsuarmilu saammaateqatigiinnissap ingerlaasiinik ilaatissinnaavavut, taamaasillutik aamma inuusuttut oqaluttuarisaanermi pissutsinut pisunullu taakkualu inuiaqatigiinni sunniutaannut annermik ilisimasaqarnerulissapput. Neriuutigaarput atuartitsissutissatut pilersaarutit ataavartumik iluarsaanneqartassasut ineriartortinneqarlutillu atuaganngortitsinikkut, inuusuttunut iluaqutaasussatut”.

Suliaq Saammaateqatigiinnissamut Isumalioqatigiissitami siulittaasup tullianik Dorthe Katrine Olsenimit ataqatigiissarneqarpoq, suleqatigalugit Kalaallit Nunaanni GUX-ini ilinniartitsisut aammalu Namminersorlutik Oqartussani Ilinniartitaanermut, kultureqarnermut, Ilisimatusarnermut Ilageeqarnermullu Naalakkersuisoqarfik. Atuartitsinissamut pilersaarutit ilinniarnertuunngorniarfinni ilinniartunut tulluarsagaapput, kisiannili aamma ilinniarfeqarfinni allani atorneqarsinnaallutik. Maannakkut tamanit takuneqarsinnaapput Kalaallit Nunaanni atuartitsissutissanut isaaffimmi www.iserasuaat.gl-imi. 

Annertunerusumik paasissutissanik pissarserusuttut ataani allaqqasunut saaffiginnissinnaapput.

Saammaateqatigiinnissamut Isumalioqatigiissitap allattoqarfia, oqarasuaat 34 67 96 imaluunniit e-malikkut molm@nanoq.gl.

Dorthe Katrine Olsen, oqarasuaat 55 31 96 imaluunniit e-mail dokaol@sanilin.gl.

Louise Kyhl, oqarasuaat 29 36 29/23 27 27 13 imaluunniit e-mail loky@sanilin.gl.

Jesper V. Nielsen (Ilinniartitaanermut, kultureqarnermut, Ilisimatusarnermut Ilageeqarnermullu Naalakkersuisoqarfik) oqarasuaat 34 56 23 imaluunniit e-mail jvni@nanoq.gl