Nunatta kujataani, qeqqani Qeqertarsuullu tunuani ilaasut pisinnaatitaaffii

1. januar 2017 aallarnerfigalugu Disko Line-p Kalaallit Nunaata kujataani, qeqqani Qeqertarsuullu Tunuani kiffartuussinissamut isumaqatigiissutini suliassat tigussavai. Tamatuma aamma kingunerisaanik kinguaattoornernut taamaatitsinernullu maleruagassat nutaat atuutilissapput.

Kinguaattoornerni taamaatitsinernilu pisuni arlalinni unnuinermut, ullaakkorsiornermut, ullup qeqqasiornermut unnukkullu nerinermut aamma mittarfiup, qulimiguullip/talittarfiup aammalu akunnittarfiup/unnuisarfiup assartuussinermut aningaasartuutit – aammattaaq nerisaqartitsinermut aningaasartuutinik taagorneqartut – Disko Line-mit akilerneqartassapput.

Angallammut ikereersimaguit imaluunniit qulimiguulimmut nassatannik tunniussereersimaguit ikereersimaguilluunniit Disko Line-p kiffartuussinissamut isumaqatigiissutit naapertorlugit angallaviini apuuffissannut apuunnissavit tungaanut nerisaqartitsinermut aningaasartuutit akilerneqassapput.

Nutaatut kinguaattoorneq taamaatitsinerluunniit angalanissap aallartinnissaa sioqqullugu pisimappat, najukkamut uppernarsaammik takutitsinikkut aningaasartuutit uku akilerneqassapput:

  • Nanortalimmi, Narsami, Qaqortumi, Narsarsuarmi, Ilulissani, Qasigiannguani, Aasianni imaluunniit Qeqertarsuarmi aallariartorlutit takkussimaguit, tassanngaanniillu Disko Line-p kiffartuussinissamut isumaqatigiissuteqarfiusumut aallarnissaanut kinguaattoortoqarpat taamaatitsisoqarpalluunniit: Disko Line-mut bilitsit akeqanngitsumik aallarfissamut inissaqartitsiviusumut tullermut allanngortinneqassaaq.
  • Disko Line-p kiffartuussinissamut isumaqatigiissuteqarfiusumi angallassinissaa kinguaattoorpat, tamatumalu kingunerisaanik Aasianni, Ilulissani, Narsarsuarmi, Nuummi, Sisimiuni aamma Maniitsumi timmisartumik ingerlaqqiffissat annaagukku, timmisartuutileqatigiiffimmi ilaaffissami aallarnissamut inissaqartitsiviusumut tullermut ilaallutit aallarnissavit tungaanut nerisaqartinneqarnerit akilerneqassaaq.
  • Timmisartumut ingerlaqqiffissannut bilitsit annaagukku imaluunniit akeqanngitsumik aallarfissamut tullermut allanngortissinnaanngikkukku, Kalaallit Nunaanni ornitassannut allannguinermut imaluunniit Islandimi Danmarkimilu apuuffissannut siullermut bilitsimik nutaamik pisinissamut aningaasartuutit Namminersorlutik Oqartussanit akilerneqassapput. Taamatut pisoqassappat Disko Line uppernarsaammik (voucher) qinnuigissavat. Tamatuma kingorna uppernarsaat bilitsilu annaasat Mittarfeqarfiit mittarfimmi sulisuanut takutissavatit, taassumalu timmisartuutileqatigiiffimmi ilaaffissami aallarnissamut inissaqartitsiviusumut tullermut bilitsivit allanngortinnissaanut bilitsimilluunniit nutaamik inniminniinissannut ikiussavaatit.
  • Aasiannut, Ilulissanut, Narsarsuarmut, Nuummut, Sisimiunut Maniitsumullu timmisartut angallassinerini kinguaattoornermi, taamaalillutillu Disko Line-p kiffartuussinissamut isumaqatigiissuteqarfiusumi angallaviani ingerlaqqiffissat annaagukku: Taamatut pisoqartillugu Disko Line-mut bilitsit aallarfissamut tullermut akeqanngitsumik allanngortinneqassaaq.

Taamaattumik angalatillutit tamatigut najukkamut uppernarsaat eqqaamasaruk! 

 Kalaallit Nunaanni najugaqavikkuit najukkamut uppernarsaat www.sullissivik.gl aqqutigalugu akeqanngitsumik aasinnaavat. Aamma najukkamut uppernarsaat kommunimi innuttaasunik sullissivimmut imaluunniit nunaqarfiup allaffianut saaffiginnillutit pissarsiarisinnaavat, taakkunanili nalinginnaasumik sullissinermut akitsuummik akiliititsisoqartarpoq.


Paasisaqarnerorusuttut attavigisinnaavaat Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu Naalakkersuisoqarfik e-mail isan@nanoq.gl.