Naalakkersuisoqarfimmmi pisortartaaq

Kommuninut, Nunaqarfinnut, Isorliunerusunut, Attaveqaqatigiinnermut Ineqanermullu Naalakkersuisoqarfik pisortartaartoq

Naalakkersuisut aalajangerput Kommuninut, Nunaqarfinnut, Isorliunerusunut, Attaveqaqatigiinnermut Ineqanermullu Naalakkersuisoqarfimmi pisortatut atorfik 1. januaari 2017-miit immikkoortortami pisortamut Ruth Lindhartimut neqeroorutiginiarlugu.

Ruth Lindhart Namminersorlutik Oqartussani ukiorpassuarni sulisimavoq, ilaatigut aningaasaqarnermik, naatsorsuutilerinermik, illuutinik ingerlatsinermik  ineqarnermillu tunngasunik aqutsisutut. Ruth Lindhart kingullertigut Kommuninut, Nunaqarfinnut, Isorliunerusunut, Attaveqaqatigiinnermut Ineqanermullu Naalakkersuisoqarfimmi pisortaagallarsimavoq 3. novembari 2016 aallarnerfigalugu.

Kommuninut, Nunaqarfinnut, Isorliunerusunut, Attaveqaqatigiinnermut Ineqanermullu Naalakkersuisoq Martha Lund Olsen oqarpoq:

”Ruth Lindhartip Kommuninut, Nunaqarfinnut, Isorliunerusunut, Attaveqaqatigiinnermut Ineqanermullu Naalakkersuisoqarfimmi pisortatut atorfeqalernissaanik neqeroorfiginiarlugu Naalakkersuisut aalajangernerat nuannaarutigeqaara. Ruth Lindhart aqutsisuuvoq pikkorissoq tunniusimasorlu naalakkersuisoqarfimmilu suliassat misilittagaqarfigilluarpai. Ruth Lindhartip suleqatigilluarnissaa qilanaarivara.”

Kommuninut, Nunaqarfinnut, Isorliunerusunut, Attaveqaqatigiinnermut Ineqanermullu Naalakkersuisoqarfimmi pisortatut atorfimmut qinnuteqartut arfineq marluupput.

 

Nuummi ulloq 30. januaari 2016

Naalakkersuisut Siulittaasuata Naalakkersuisoqarfia